成交期將於下月屆滿的尖沙咀首都廣場，現時放盤摸售店舖數目逾六十個。

今年二月辣招推出前，在短短數日間火速沽清嘅尖沙咀首都廣場約600個舖，臨近下個月成交期前，有幾個炒家怕「上身」，決定「大出血」劈價蝕讓出貨，每宗帳面虧損約33萬至34萬元，蝕幅約8%至近12%。

成交期將於下月屆滿的尖沙咀首都廣場，現時放盤摸售店舖數目逾六十個。

近日商舖蝕摸及工廈撻訂重售個案

至於近排拆細熱炒嘅荃灣DAN6工廈樓花盤，有投資者唔記得落訂要過數，發展商取消交易後，依家重新放售318萬元，比之前售價加咗14%。

首都廣場1至3樓共約600個舖位下個月成交期就屆滿，依家有部分炒家盡最後努力希望可以摸出個舖位，有啲願意減價達70萬元，仲加佣金到6%鼓勵代理搵客，難怪該盤唔少業主都心寒，寧願「走得快、好世界」。

摸貨六個月蝕34萬

劉Sir收到風，該盤1樓有幾個舖已經摸出，不過全部要蝕本賣，其中一個雙號舖，面積約58方呎，投資者今年以336萬多元購入，依家只以約302萬元摸出，約六個月帳面損失34.4萬元，蝕幅超過10%；同層另一面積約56方呎單號舖，啱啱以288萬元摸出，投資者持貨相若時間，帳面虧損約34萬元，蝕幅近12%。有代理話，佢哋帳面蝕10餘個百分點已算好彩，事關萬一成交期前賣唔到，撻訂嘅話就白白冇咗兩成訂金。

工廈DAN6賣貴14%

同樣係拆細賣嘅荃灣DAN6工廈，由於距離成交期仲有一年多，加上細單位已近售罄，所以香港興業（00480）都唔憂賣，近排就將一個取消交易嘅高層單位重新放盤，定價約318萬元，呎價約6,490元，比起一個多星期前售價加咗約14%。有代理仲話，該廈19樓全層都好似洽購到尾聲，涉資約3,800萬元，呎價約6,500元。

近排觀塘都有好多商廈及工廈摸貨個案，但當中有賺有蝕，聽講宏基資本大廈有個低層戶以約7,000萬元摸出，呎價約9,540幾元，比起原業主今年初一口氣購入該廈兩層嘅平均呎價約8,720幾元，有近10%升幅。不過，有個投資者為減磅，剛以唔使820萬元摸出同區皇廷廣場低層戶，呎價8,400餘元，半年左右帳面損失56萬元，蝕幅約6%。