市傳內地將於七月中旬重啟IPO，中資券商股具中長線吸納價值。(資料圖片)

雖然上周五美國公布嘅就業數據優於市場預期，進一步確認聯儲局會朝「退市」嘅方向做嘢，但市場對「退市」嘅恐慌已減退，美股照升可也。事實上中國經濟持續高增長嘅日子已成過去，未來將重質輕量，喺經濟轉型升級期間，投資策略宜盡量放輕指數升跌，多做工夫發掘優質個股。

市傳內地將於七月中旬重啟IPO，中資券商股具中長線吸納價值。(資料圖片)

回說上周五市況，早段A股威過一輪，但尾市又再走軟，聽聞係早段市場傳出國務院喺收市後有公布，引來市場憧憬有利好消息，誰知表叔們打聽過後知道冇料到，所以尾市現獲利回吐，結果滬綜指由全日高位2,021點回落至2,007點收市。之後國務院發布嘅「國十條」指導意見，果然只係重申現有政策居多。

創科有待調整完成

美國經濟數據佳，上周五金價創近三年低位，反而紐約期油上周五曾高見103.68美元，乃逾年高位。要押注美國經濟復甦概念，個股選擇有創科（00669）、利豐（00494）、偉易達（00303）、德昌（00179）等出口股。不過，見創科股價自上月中10日線跌穿50日線，且二者距離日漸拉闊，乃去年次季以來首見，係唔係走資潮股票好淡皆沽之下嘅現象，不得而知。穩陣起見，宜待其10日線重上50日線，確認調整完成，再謀入市機會。

上月國家隊入市增持內銀A股，阿莊亦曾提及，可以開始重新留意券商股，亦不只一次表示，若然想中長線吸納中資金融股，寧揀券商股莫揀內銀股，呢個睇法至今未有改變。上周五市場又傳出七月中旬內地將重啟IPO，惟官方冇承認亦冇否認。老實講，領導人對今年經濟增長達標胸有成竹，但人行似乎唔會再主動放水，相信到咁上下時候，內地好大機會重啟IPO，讓A股市場重新啟動融資功能。魚缸有水，魚兒則活，這不但可引導資金重投規範化市場，亦正好彌補到影子銀行增長放緩下市場流動性出現嘅缺口，確保實體經濟保持穩定增長。

目前，中信証券（06030）及海通證券（06837）市帳率分別係1.3倍及1.2倍，五月上市嘅銀河（06881）則仍在潛水。要揀，阿莊都係傾向選擇前兩隻龍頭，相信季內會有理想嘅長期入市點，中信回落至12元、海通回落至8元水平，都可認真考慮落首注。