恒指期貨走勢

昨晚美股假期休市，港股昨日趁機反彈，恒指升321點，報20,468點，主板成交僅483億元，乾升味道極濃。

恒指期貨走勢

睇番昨日大市，恒指即市低位20,318點，10日線20,317點剛好失而復得，但指數即市高位20,532點，低於周三的高位20,590點，可見雖然外圍氣氛改善，但睇好的大孖沙要賭周五晚數據，故未有積極試圖收復周二、三的失地。昨日低成交反彈，似是一次急跌後修正，多於確認見底。

即月期指早市見過20,269點低位後，到十一時造出20,534點的全日高位，較明顯調整在午後出現，個人感覺午後的確有失速的情況，買賣兩閒。截至昨晚十時，夜期轉為高水。

今日早盤無美股作參考，過夜盤又要賭埋美國就業數據，雖然筆者仲係傾向「買」底，現水平亦同星期三止賺位20,415點相去不遠，無乜蝕底，但賭少日亦無傷大雅，皆因超短線個市仲係有可能震一震落20,215及20,029點兩個支持位。