太陽日誌

港股真係基金經理嘅英雄塚，除巴菲特之外，史提芬心目中仲有兩個神級偶像，一個係彼德林治，另一個是二○一○年退休後復出，而且首度進軍亞洲的歐洲股神安東尼波頓，可惜佢創立的「中國特殊情況基金」，表現一直麻麻，最近歐洲股神宣布「再次」退休，口痕友認為老人家晚節不保，是不了解國情所致。

太陽日誌

綜合大行預測潤地業績（港元）

認識的老外基金經理，的確發現當中不少低估在中國股市賺錢的難度，筆者個人感受，投資中資股，傾向理性企業分析的歐美傳統想法，真係不太適用，唔少近年尚有表現者，都係揣摩國策方針，熟知貨幣政策取向的機會主義者，基本上，同老外芬佬的思維好唔同。

另一客觀因素，係○九年中央在美國次按風暴之後，推四萬億救市，整個A股之後無好過，今日滬綜指比當年高位3,478點，仲累積跌緊四成三。

就業數據成焦點

講番個市，恒指兩日大隊655點，尋日彈返321點，收報20,468點，主板成交縮到個半月新低，得483億，市後解畫，話埃及軍方表態罷免總統穆爾西，股市報復式反彈，加埋葡萄牙債息在短期可能組聯合政府的消息下回落，利好外圍氣氛，個市乾升，一來內地拆息繼續回落，加埋A股平穩兼上番兩千點樓上，之前兩日隊得離譜，來個修正合理，尋晚美股無市，市場博反彈誘因減低，近期環球股市擔心美國就業市場復甦會提早退市，今晚美國出六月就業數據，順理成章成為焦點，估計失業率保持7.6%或者輕微回落到7.5%，對後市影響比較溫和。

過去兩個月，內房股跌得好過分，六月錢荒仲踩多一腳，唔少估值開始有吸引力，趁個市無乜搞作，搵首五個月累積銷售數字，發現唔少其實已經超過全年目標四成二以上。

暫時嚟睇，全年銷售目標完成度最高的，依次係中國海外（00688）65%、越地（00123）57%、潤地（01109）50%、方興（00817）47%、世房（00813）、碧桂園（02007）及旭輝（00884）46%、保利（00119）44%、綠城（03900）及合景泰富（01813）43%、遠洋地產（03377）42%，當中純揀資產折讓，筆者幾鍾意越地及遠洋地產，分別有66%及42%折讓，負債較輕的則潤地頗可取，財務槓桿約40%，低過同業平均的44%。由近幾日低位開始見支持的姿態，看來內房股有醞釀反彈條件。