滬杭甬今年首季盈利增長保持穩定，反映內地公路節日免收費措施的影響有限。(資料圖片)

美股尋晚休市，此前恒指反彈321點，但大市成交僅483億元，似係大戶藉美股休市托住指數方便出貨多於真係有心買上，入場博反彈分分鐘接下火棒。呢期全缸最殘嘅煤炭股，尋日終於來個終極一彈，神華（01088）、兗煤（01171）及中煤（01898）升4至5%，但睇成交唔多似樣，短線反彈上唔番10日線都係難成氣候，短炒宜見好識收！

滬杭甬今年首季盈利增長保持穩定，反映內地公路節日免收費措施的影響有限。(資料圖片)

阿莊100萬元投資組合

尋日內地魚缸出現一個新詞彙：「跑冒滴漏」，事緣國務院會議話，各部門及單位要積極整改，及時糾正各類違法違規行為，把被擠佔挪用嘅錢歸位，把「跑冒滴漏」嘅錢堵住，並進一步盤活存量，善用財政資源。呢句「真言」，大概就解釋到點解呢期魚缸出現四方八面嘅沽售潮，其實跌市主力沽家唔係老外而係表叔，皆因內地對沖基金面對龐大贖回壓力要沽貨、貪官污吏亦急於沽貨套現填數。咁睇落，若然表叔大戶要繼續套現北上，下一期嘅套現對象可能輪到樓、甚而係喺濠江各大番攤嘅戶口，缸邊友宜密切留意形勢變化，適時規避風險。

有病睇醫生，一個「信」字好緊要，沒有互信嘅基礎下幾好醫術都要打個折！依家新領導人就好似大國手咁，為長年身軀瘋狂膨脹、暗病處處嘅中國經濟處方治療，期間短痛難免，但只有咁先至可以換來長期嘅健康。投資者必須認清時勢，相信領導人嘅能力，耐心等候整治成效出現。阿莊對中國市場長遠發展並不悲觀，且感到嚟緊能唔能夠食正新一輪大升浪，搵夠退休金，關鍵就係喺未來六至九個月，能否成功捕捉到中國市場長期低點嘅入市良機。

講番組合持股，尋日見隻中燃（00384）上到8元就頂住，故決定沽出，似乎幾次炒呢隻股都唔太順手，希望唔係一沽又狂升嗰隻！再睇其他個股，阿莊一直有留意滬杭甬（00576），見佢喺呢期跌市表現都算硬淨，尋日高位見6.15元，收報6.11元，升4.4%，成交2,798萬元。

免收費措施影響有限

今年以來其股價維持喺5.5至7元水平上落，基本面方面，旗下浙商證券已申請上A股，但A股尚未重啟IPO，所以呢項資產價值尚未有機會完全體現喺股價上。

今年首季度，公司純利同比增5%至4.4億元人仔，公路節日免收費措施影響有限，現價往績市盈率12倍，息率6厘，料股價可維持喺今年以來嘅波幅區內上落，6元樓下可逢低收集，潛在驚喜將來自分拆浙商證券到A股上市嘅時間表明朗化。