商廈樓市低迷，市場罕有出現甲級商廈單位搞開放日吸租客。(資料圖片)

美國聯儲局退市等負面消息接連而來，令本港工商舖租賃市場雪上加霜。傳統商廈區嘅中區，同新興商業區嘅觀塘，有甲級商廈業主罕有咁搞開放日，兩區加埋約有6個呢類單位向準租客招手。其中金鐘力寶中心2座有個中層海景單位，罕有咁主動開放畀人睇。另貴為全球地舖呎租最貴嘅銅鑼灣，區內波斯富街有地舖業主，都高調委託代理搞開放日。

商廈樓市低迷，市場罕有出現甲級商廈單位搞開放日吸租客。(資料圖片)

有個代理老友同劉Sir呻，「加辣招」之前，工商舖租售旺到爆，邊有人咁得閒，全日企喺個單位等客。不過，時移勢易，依家市況差，好幾個星期都開唔到張買賣單，惟有勤力啲做租賃，而業主都深明此道理，大搞開放日谷租。

中區甲廈租務勁冷清

佢話上個月成個中區甲級商廈租賃十宗唔夠，前景仲危危乎。有見及此，上述力寶中心2座中層單位，出招前已開始放租，業主早排就主動出擊開放畀有興趣人士隨時任睇，個單位面積約2,000方呎，意向呎租都係維持約50元，月租約10萬元。過去一個星期已經有約4組客睇過。

除咗金鐘外，上環信德中心西翼都有個高層單位，放租近半年，問盤嘅人唔多過10個，業主早前都面對現實，決定開放單位畀人睇，意向租金就無減，企硬每方呎約45元，即月租約22.5萬元。

東九盤增 搶客靠新意

近幾年東九龍有好多新建商廈入伙，租盤大增之下，業主都要搞搞新意思吸客。萊斯物業高級客戶經理伍卓仁話，觀塘寧晉中心有個高層單位，業主上個月放租，不過想突圍而出，所以就搞開放日，依家都有七、八組客睇，唔少係樓上樓下嘅租客，業主叫租每方呎約28元，月租約7萬元。

銅鑼灣一線街舖租金貴，唔少業主都想快啲租出個舖。香港置業簡元鎧話，波斯富街56號地下一個原由鞋店租用舖位，剛交吉冇耐，業主即刻招租同搞開放日，吸引唔少外區商戶入舖又影相，又度尺，佢話個舖面積約1,308方呎，業主意向月租約75萬元。