恒指期貨走勢

向來市場唔多重視中國官方非製造業PMI,但在市況氣氛唔好底下,加埋歐債息急升的消息,昨日恒指以近全日高位開市,之後完全被沽盤壓制,埋單跌511點,報20,147點,10日線再失守,就連短線反彈浪,19,426至周二高位21,004點的0.5回吐支持20,215點都守唔住。

恒指期貨走勢

前日提過,由期指完成轉倉後成交快速萎縮,多少顯示上一輪冚淡倉已大致完成,客觀因素又較為對淡友有利,只係估唔到,兩日掟番逾800點落嚟,期間好友幾乎完全無嘗試還手的迹象。

期指昨日開市半個鐘左右已跌穿20,415點的止賺位,筆者於高位無食胡,感覺真係比輸錢更難受。客觀分析,過去幾星期跌市,仲可以賴內地錢荒,但昨日人仔隔夜息已落番去超過一個月低位,內地經濟及中資股份中期業績如果無暗病,就肯定係基金已經洗倉洗到無章法可言。雖然筆者仍相信上次低位19,426點應該離浪底不遠,但見到單日明顯轉勢訊號出現前,揸家最好停一停,忍一忍。