內地經濟增長放緩，水泥市場需求疲弱，中建材後市未能樂觀。(資料圖片)

港股前日挾完淡倉後弱勢又再原形畢露，尋日恒指唔見五舊，內險及內銀股持續弱勢，融創（01918）及綠城中國（03900）均跌9%，其他如玖紙（02689）、創維（00751）、中國無線（02369）、達芙妮（00210）跌幅介乎5至8%。顯然，中、外大戶齊齊沽貨套現，沽嘅都係大晒士股，所以要有心理準備，月內迎接今年魚缸另一低點。

內地經濟增長放緩，水泥市場需求疲弱，中建材後市未能樂觀。(資料圖片)

中國因素短期維持負面，乃港股不振嘅主要原因。本周五，內地商行便要補繳存款準備金，由於六月底要應付年中考核，存款規模增大，故今次補繳壓力不小，再加埋月內四大行須向中央匯金上繳1,200億人仔現金分紅，故短期內銀將再次面對錢荒考驗。阿莊估計，七月上半月大市仍然波動，直到中旬以後，內銀存款準備金退還、上市公司分紅資金重投魚缸，以及公開市場大量資金到期，市場流動性才會逐步回復寬鬆，魚缸才有望回穩。

不宜輕言入市溝貨

唔少股民查問如何處理手頭蟹貨，阿莊就認為，即使尚有能力，暫且不要輕言入市溝貨；若不想長期作戰，就要逢反彈減磅，妥善控制持倉風險。

回說個股表現，中國建材（03323）股價尋日再創五十二周新低，見6.24元，收報6.26元，跌5.5%，現價較今年首季高位足足唔見一半，如今市值僅180億元。股價低處未算低，除咗因為水泥市場需求疲弱之外，近年中建材積極四出併購，令負債大增，亦係利淡因素之一。截至今年首季止，其總負債為2,104億元人仔，資產負債率達82.4%，奈何公司就赴A股上市集資嘅申請已撤回，未來如何降低財務風險，乃一大挑戰。

經濟好、生意唔憂做嘅情況下，市場好少理會企業償債能力；但換着如今經濟增長持續放緩、市場需求疲弱、企業業績乏善足陳、融資成本趨升等不利環境之下，則債重之過足以嚴重拖低公司估值，今年以來中建材嘅股價表現便可見一斑！

以往績計，中建材現價市盈率僅4.8倍，表面上好便宜，實際卻不然，特別係今年內地經濟增長放緩勢頭頗大機會延續至明年首季或上半年，以往績作為估值參考要打折。周線圖顯示，其股價要落到5.5元區域才有較大支持，短線反彈頂多上到10日線6.8元附近，有貨未走要好自為之！