樓市出更：尖沙咀甲廈交投 狂食蛋
近幾年九龍甲級寫字樓買賣焦點轉咗去東九龍新興商貿區，搶走尖沙咀傳統商業區唔少客源。今年上半年，包括康宏廣場等全區11幢指標寫字樓，暫時只有約80宗買賣，相對新興商業區東九龍已破百宗明顯遜色。尖沙咀除咗南洋中心今年仲未「開齋」外，同區新東海商業中心都有四個月係成交「捧蛋」。
尖東包括康宏廣場等十一幢指標甲級商廈，今年僅錄八十宗買賣。（資料圖片）
黃璜指出，目前尖沙咀寫字樓買家以中港商人為主。（資料圖片）
尖沙咀指標商廈半年成交
政府今年二月底推出雙倍印花稅前，成個九龍區寫字樓買賣勁旺。劉Sir睇番香港置業同埋市場嘅資訊，原來一、二月時期，尖沙咀康宏廣場、新東海商業中心同星光行等共11幢指標甲級商廈，買賣成交加埋都有近50宗，但辣招一出，買賣就急轉直下，上半年只係有80宗買賣。另外，東九龍8幢新建寫字樓買賣就已錄逾百宗，其中單係觀塘皇廷廣場就錄超過40宗。
新東海四個月無單開
尖沙咀甲級寫字樓今年買賣淡靜，其中南洋中心對上一宗買賣已經係舊年嘅事，該物業今年就仲未有買賣成交。據悉，該廈現時買賣放盤約有40個，平均每方呎叫價約1萬元。而新東海商業中心都只係錄到4宗成交，期間有多達四個月「食蛋」；至於較近期的成交係一個高層單位，以約3,750萬元售出，平均呎價只約9,900元。
今年尖沙咀區買賣最旺嘅商廈係新文華中心，暫時共有約27宗買賣，睇番當中超過20宗都喺出招前，第二季暫僅有一個月份錄得買賣。
尖東樓舊 投資者耍手
今年買賣成績同樣逆市做好的星光行，至今錄約14宗買賣成交，惟大部分亦於出招前成交，該商廈上半年共有三個月份未錄得買賣成交。
香港置業（至尊商業）區域營業董事黃璜話，尖沙咀唔少甲級寫字樓樓齡較大，一般都超過十年，好難同九龍東新建寫字樓比。加埋政府「辣招」後，買家入市成本高，而且加息周期陰霾下，唔少長線投資者都要重新部署，市場觀望氣氛更濃，以依家市況嚟睇，寫字樓「捧蛋」會繼續多。
