Fundman睇市：高息股 再跌有得諗

伯老幾句說話，令美債孳息三扒兩撥挾到2.4厘，去到一一年十月以來最高位。有趣的是去年九月推出每月買債上限850億美元的QE3時，承諾過超低息政策會延續到一五年，會唔會臨尾走數？真係天曉得。雖則話美債美股對伯老突然講退市反應好鬼大，不過美國聯邦基金利率期貨顯示，一四年底，美元離開0至0.25厘超低息的機會率（即0.5厘以上），只係由上星期的35.4%升到40.2%，唔算郁得好多。

周四，港股勁插604點，收報20,382點，創九個月新低。主板成交去到753億的一個月新高，沽空比例升至15.33%近期高位。事實上，美國在經濟恢復元氣下退市，反而不及中國經濟走疲兼水緊咁令人擔心。尋日滙豐的六月中國製業PMI指數預覽值跌到落48.3，差過預期的49.1及五月份終值49.2。中國要擺脫粗放型經濟，開始重質不重量，對經濟下行容忍度到底有幾大，今次確實係一個艱難考驗！

同一時間，內地水緊情況浮面，尋日人民幣隔夜及一星期拆息，分別勁升5.78厘及2.92厘，去到13.44厘及11厘，前者創下○六年五月以來最高，唔少企業用作出口對沖的人民幣一年期不交收合約，兌美元尋日隊到落6.3045的三個半月低位，同官方牌價6.1286差距擴大到2.8%，差距更係四年最大。大行估水緊情況要持續到七月初，個市日日畀淡友借題發揮，未來呢十幾日，有貨在手的股民真係好難捱。

華能屆吸引水平

今年中國股票，除TMT股因多得內地鋪4G網及憧憬阿里巴巴上市效應，表現一枝獨秀外，其他幾乎都隊到四腳朝天。短期大超賣之後，到底可以買乜？暫時仲係心大心細，如果美國可以控制通脹在2.5%目標樓下，美債息去到2.4厘，或者已經把退市的可能性反映得八八九九，高息股或者最多仲有5%左右跌幅已經差唔多，領匯（00823）去到36元可以諗諗。其次係電力股，潤電（00836）博反彈計劃，暫時同股東大會一齊被押後，但睇見華能（00902）去到7元左右跌唔落，有啲手痕，若然未來兩星期再有恐慌跌市，穿一穿6.84元的250日線就更妙。