內地經濟「急煞車」下，估計A股估值仍有下調的風險。(資料圖片)

美國聯儲局說明退市路線圖，引發全球金融市場震盪，加上滙豐六月中國製造業PMI初值創九個月新低，內地Shibor隔夜拆息抽高578.4點子至13.444厘，滬綜指跌2.7%，喺雙重打擊下港股急跌逾600點，息口敏感及高息股顯著受壓，國企指數亦急跌319點，內房、內銀及本地地產股成重災區。留意今日係內地股指期貨結算日，市況可能會較波動。阿莊就聽聞，尋日有北方大戶沽港股套現，班水北上救急，睇嚟月底前港股沽壓仍會異常大，現時沾手衍生工具嘅風險甚高，想長線低吸現貨，依家亦未喺時候。

內地經濟「急煞車」下，估計A股估值仍有下調的風險。(資料圖片)

美國退市本來顯示當地經濟正逐步好轉，但不正常嘅貨幣政策已施行咗好一段時間，要重新修正過來，過程必然痛苦。長息回升，息口敏感及高息股估值將持續受壓，皆因其防守性特色逐步褪色，早幾日阿莊已預告領匯（00823）未跌完，未來一段時間亦唔會建議大家沾手。

債重股避之則吉

息口敏感嘅地產股多面受敵，一來聯儲局減少買債，美元匯價將上升，意味資產價格將會由高位回落，樓價下跌預期不利物業投資；另一方面，債息上升會令借貸成本上升，用家置業更加審慎，呢啲都不利樓市發展。地產股繼續尋底，負債較高嘅地產股就更加係避之則吉。

再睇內地因素，尋日拆息大幅抽升，但至執筆為止未見人行有任何行動，足以說明新一屆領導人喺處理經濟及金融問題上較堅持，為咗成就結構改革，對經濟增長放緩嘅容忍度較高。阿莊有感，依家上大人做緊嘅嘢同「急煞車」冇咩分別，喺預視第三季內地經濟最多只會跌定而唔會大幅好轉下，嚟緊中國市場估值仍有下調風險。綜合各項因素，若短線大市有技術性反彈，阿莊亦會考慮適量減磅。

個股方面，尋日提及嘅青啤（00168）唔使跌，平收54.75元，果然硬淨。不過，依家唔係買嘢嘅時候，戒急用忍！

前日鋼鐵股逆市高收，尋日跌幅亦有限，鞍鋼（00347）跌1%、馬鋼（00323）無升跌。原來大摩報告引述內地消息指，最近國務院指示河北省政府嚴格執行禁止非法新增鋼材產能，近日省內兩個未獲批文嘅新鋼廠便因此而被叫停，部分相關官員更被調查或停職，顯示中央嚴肅處理控制污染及減少過剩產能嘅問題。

大摩表示，雖然喺顧及就業及GDP增長等因素下，內地鋼鐵業嘅過剩產能難以一下子全部關掉，致令行業長遠前景仍欠吸引，但相信短期關閉產能嘅消息，對鋼鐵價格影響屬正面，並預計未來三十日馬鋼及鞍鋼股價會上升。信不信由你！