東九龍一帶近年大搞工廈活化，區內甲廈租金勢將受壓。(資料圖片)

政府為咗鼓勵重建同全幢改裝閒置嘅工業樓宇，早兩年大搞工廈活化措施，但此舉就為東九龍甲級寫字樓租金受壓埋下「伏筆」，點解？高力國際同劉Sir分析，38宗已經簽立嘅工廈活化項目，有21個位處觀塘同九龍灣區，供應多咗租金自然有影響，租金升咗幾年嘅東九龍甲廈，出年有機會跌約5%。

東九龍一帶近年大搞工廈活化，區內甲廈租金勢將受壓。(資料圖片)

高力國際顏慧萍（右）預計，明年東九龍甲級寫字樓租金跌約5%。左為李頌恩。

活化工廈申請及獲批統計

啟德郵輪碼頭效應，劉Sir都幾睇好東九龍商業發展，老友高力國際李頌恩都話，二○一一年下半年東九龍甲級寫字樓平均租金已經升穿○八年海嘯前高位，仲保持升勢，截至上月底呎租已經去到37元。

全幢申改裝 上月82宗

嚟緊仲係咪會繼續升，就未必咁樂觀，佢話，截至上個月政府收到82宗全幢工廈改裝申請，38宗已簽立特別豁免書，位於觀塘及九龍灣項目就多達21個咁多。再計埋啲新建項目，今年至二○一五年期間，估計九龍同新界會有超過250萬方呎新增寫字樓樓面，大部分項目都集中喺東九龍一帶。

該行顏慧萍話，出年主要嘅出租寫字樓新供應全部來自工廈活化，好似Pioneer Place同觀塘鴻圖道73至75號全部都位於東九龍，加埋其他地區項目就為出年提供約80萬方呎寫字樓樓面，預計出年東九龍甲級寫字樓租金受壓，料跌約5%。而今年則保持平穩，下半年料升約2%，今年全年則升約7%。

荃灣工廈樓花下周推

此外，一手新盤買賣淡靜，發展商都狂谷旗下商用物業。有代理話，香港興業（00480）荃灣灰窰角街6號工廈重建樓花盤，改咗名「DAN6」，聽講最快下星期展開銷售，估計平均呎價約5,500元起，由於項目部分單位面積唔使500方呎，入場費料約270萬元左右，市場有人爆料，代理促成佣金約2%。據悉該工廈物業有20層，大部分樓層間咗約11伙，面積由近500至約760餘方呎，全層約5,000方呎，料最快出年年中入伙。