恒指期貨走勢

個市等聯儲局主席伯南克議息後開金口，但近期比外圍快半拍的港股經已「跌定先」。恒指昨失守21,000點關口，跌238點，收報20,986點，即月期指收市報20,938點，跌222點，低水48點，成交反彈去到7.43萬張，主板成交618億元，無乜瞄頭。但值得留意沽空佔成交比例升至13.25%，是超過一年新高。

恒指期貨走勢

昨日話想跑轉短線博國期反彈，點知早早已經要打手板，朝早穿9,625點之後倒水一樣。睇番今轉恒指由20,652點低位反彈上21,272點見頂，都算係補番21,069至21,307點的下跌裂口近85%，反之國指真係弱到離晒譜，9,522彈上9,820點已經行人止步，只能回補上星期9,771至9,927點的下跌裂口大約31%，三分一都唔夠。

上海同業拆息昨日勁升，加上匯金上星期托市的消息恍如泥牛入海，已經放棄博反彈念頭近三個星期的筆者，決定睇多日，等睇埋國指能唔能夠守得住9,522點，唔再破底，先至諗下一步點做。