太陽日誌

近期港股有領先外圍股市的情況，前晚道指升138點，恒指幾乎不為所動，尋日早市高開後隨即掉頭，埋單收20,986點，跌238點，主板成交618億唔算多，不過空軍相當活躍，沽空佔成交比例升上一年新高，去到13.25%。盈富（02800）沽空比例急升至九成七，其次係恒生H股ETF（02828）的八成二，大孖沙以沽空指數基金作為對沖工具，為伯老會後聲明可能引起的市場震盪，打定底減低損失。

太陽日誌

綜合大行預測合生元業績（人民幣）

種種迹象顯示，後市確係有山雨欲來之勢，愈來愈多分析員調低中國經濟增長預測，同時提高硬着陸的風險系數。尋日滙豐經濟師簡世勛，將今、明兩年內地經濟增長預測由8.2及8.4%，向下修訂到7.4%。美銀美林話，31%基金經理睇未來十二個月中國經濟增長疲弱，係一一年十月以來最淡。再者，內地水緊情況惡化，尋日隔夜及一星期上海銀行同業拆息，去到7.66及8.07厘，比前日急升2.06及1.37厘。賓架界傳四大行催促人民銀行減存款準備金率兼泵水，以解燃眉之急，可惜不得要領。

到底上述教人不安的消息，有幾多成已經在A股弱勢中反映？見仁見智。如果係技術走勢信徒，滬綜指今年二月在2,444點見頂，撻落2,161點，五月反彈去到2,334點又再行人止步，之後輾轉下滑，到公布打假後得番1%的出口增長，A股連上次低位2,161點都守唔住，走勢真係差無可差。

市況如斯，估計唔少專欄會建議睇番高息、公用甚至REITs等避險資產。但今次跟以往股市調整不盡相同，內地經濟唔多掂之外，仲夾埋美國退市的風險。自從踏入六月，全球股、債、商品及外匯統統跌，資金唔係傳統想法「棄債投股」咁簡單，似乎為退市去槓桿化做準備。刻下最理想避險方法，可能係減低入市注碼，保留較多現金等掃平貨機會來臨。

奶粉股價高飲唔落

蒙牛乳業（02319）以每股3.5元買起雅士利（01230），估唔到套息客可以掃到雅士利上去3.46元（收3.43元），水位得番溫巴仙多些少。自被中糧系收歸己用之後，蒙牛已係半隻國企，在內地買嘢十拿十穩。短短幾個月間，先係增持現代牧業（01117），跟住引入法資達能搞乳酪，如今再吞埋奶粉商雅士利，掌舵人野心路人皆見。口痕友話，四月發的一批股票獎勵計劃，確係夠晒激勵士氣！難怪蒙牛尋日股價仲升得多過被收購的雅士利。有趣是，連同業合生元（01112）都炒埋上去，勁升6.7%，見46元，差2元又番到去五十二周高位，但既然筆者一心想減減磅（包括持倉同體重），往績30倍PE實在搶唔落，惟有繼續做塘邊鶴，戥班奶粉黨高興。