青啤今年以來股價累升逾兩成，明顯較整體大市強勢，值得留意。(資料圖片)

內地拆息抽升，半年結前鬧水荒，魚缸有難！如無意外尋晚美國聯儲局有議息聲明，故見尋日缸邊友按兵不動，唔做唔錯，恒指最終跌穿21,000點收市，報20,986點，跌238點，成交618億元。見大市沽空比率高企，睇嚟淡友又加注，短線最好避開指數相關產品，免受池魚之殃。

青啤今年以來股價累升逾兩成，明顯較整體大市強勢，值得留意。(資料圖片)

內房股尋日都唔多精神，皆因市場盛傳房產稅將擴大試點，潤地（01109）跌3.2%、中國海外（00688）及富力（02777）分別跌1.9%及2.7%、合生創展（00754）跌3.6%。內房同內銀股都各自有其利淡因素掣肘，難怪國指彈極都彈唔起，尋日收報9,584點，跌1.5%。事實上，六月份以至上半年內地經濟數據表現頗大機會未盡人意，加埋IPO重啟，若然中央唔適量「鬆手」放水，相信即使匯金再次入市，亦無助A股回升，想撈底A股ETF或相關輪證，實宜三思。

鋼鐵股難成氣候

前日炒咗一轉嘅航運股，尋日無以為繼，弱勢始終係弱勢！尋日輪到鋼鐵股有異動，但睇成交相信一樣係難成氣候。身處淡市，個股只會強者愈強，弱者愈弱，明白呢個道理，揀股會較容易落手！

事實上，今年以來，能成功對抗地心吸力，跑贏大市嘅中資股實在唔多，今日就睇睇兩隻「強勢孖寶」﹗其中一隻係上月下旬阿莊推介過嘅中國建築（03311），今年以來股價累積升幅有三成多，現價12.26元，距離五十二周高位12.74元不遠，「強勢股」之名當之無愧，皆因公司業務未受內地經濟增長放緩影響，今、明兩年訂單表現能見度高，為股價提供有力支持。阿莊維持該股中線目標睇14元，可逢回吐收集。

另一隻可留意嘅強勢股係青島啤酒（00168），今年以來股價累升逾兩成，現價54.75元，距五十二周高位56.45元不遠。公司喺內地啤酒市場手執牛耳，收益相對穩定，派末期息每股0.4元人仔將於下月二日除淨。股價方面，由去年末季延伸嘅上升軌，重要支持喺50日線（目前處52.9元）。以此推斷，只要股價企穩52元水平，可望延續升勢，下個阻力位喺58元。