黎永滔指出，已持有英國牛津街（圖）三項商用物業，有機會成為該街道持有最多物業的中國人。

政府幾個月前，突然推出「辣招」，本港工商舖投資市場即刻謝晒，唔少投資老手包括「舖王」鄧成波（波叔）喺今上半年都停手唔入貨，並積極「減磅」出貨，合共涉及金額超過34億元。而舖壇老手黎永滔（滔哥）就選擇在外地再下一城，啱啱斥約7,600萬英鎊（約9.12億港元）掃入英國倫敦牛津街291號全幢商用物業，係佢喺英倫第三項商業物業投資。

黎永滔指出，已持有英國牛津街（圖）三項商用物業，有機會成為該街道持有最多物業的中國人。

黎永滔

今年上半年投資者買賣物業個案

滔哥同劉Sir講，英國物業買賣稅制簡單好多，外國人買樓唔會收多啲稅，加上轉手又無額外印花稅，而且當地銀行承做商用物業按揭可達七成，所以早排去英國探仔女期間順道睇盤。

加碼爭贏英全幢物業

上述牛津街全幢商用物業，業主叫價7,500萬英鎊；滔哥話物業每年有約320萬英鎊租金收入，加上遲少少有地鐵站可達機場，所以唔使一個星期就主動加多100萬英鎊，擊敗西班牙準買家。該物業樓高5層，樓面約3萬方呎，原業主係英國著名商人Lord Alan Sugar於○八年以約3,800萬英鎊購入。

滔哥仲話，佢舊年聖誕節都用3,800萬英鎊（約4.56億港元）買入同街527號一個三相連地庫、地舖及一樓，收租回報都有4.3厘。至於一○年斥3,600萬英鎊購入嘅同街221至223號一幢商廈，依家已經升值一倍。

波叔沽工廈兩年倍賺

辣招令到本港投資者積極出貨，5個資深投資者喺年初至今暫時已合共沽咗約15項工商舖物業，其中波叔沽咗6項工廈及商舖物業，套現達約23億元，係期間出貨量同埋金額最大嘅投資者。

好似佢一一年初以約4.7億元買嘅觀塘偉業街長輝工業大廈全幢，批咗可以改做酒店，提供286個房間，今年初以約9.3億元賣出，每個酒店房間成交價約325萬元，波叔約兩年間帳面袋約4.6億元，賺幅近一倍。