魚缸Blogger：歐舒丹再跌可撈貨

歐舒丹（00973）啱啱派成績表，由於盈利表現無預期咁好，尋日以大陰燭失守多條平均線，收報21.25元，急跌7.2%，後市睇法好壞參半，不妨（目及）實博反彈機會。

歐舒丹去年銷售淨額達到了全年超過10億歐元的目標，錄得增長14.2%，期內整體同店銷售增長2.3%，其中中國同俄羅斯嘅銷售增長最有睇頭，升幅分別為24.2%及30.4%，而同店銷售增長均逾9%，可見未來增長亮點依然係新興市場。公司話今年全球產品平均加價3%，而核心品牌「L'Occitane en Provence」亦正積極在新興市場建立據點。

摩通、瑞信同德銀都於績後下調目標價，花旗、野村同瑞銀維持不變，巴克萊則上調，畀佢目標價介乎18至26元不等。如果睇圖，股價自去年九月起沿10日線上升，今年一月創出27.6元歷史新高後反覆回落，但喺低位19.96元有承接，有見周一股價仲喺保力加通道頂部22.61元樓上，尋日跌至中軸附近，可候低喺底部20.1元附近上車，上望23蚊。