太陽日誌

聯儲局議息會議前夕，前晚美國總統奧巴馬接受電視訪問，話伯南克擔任聯儲局主席時間已比預算中長。雖然伯老○六年上任到依家做了七年，對比上一任一做就十九年的格林斯潘，點講都唔算長。但言者可能無心，聽者卻有意，尤其今年伯老已講明反傳統唔會出席Jackson Hole財長年會，奧巴馬言論看來已確認伯老明年一月任期滿之後，唔會留低，本已曖昧到暈的退市安排，看來又會多一分變數。

太陽日誌

綜合大行預測中遠業績（人民幣）

上周四，匯金一口氣掃四大內銀，論規模是○八年至今四次入市托市以來最勁，有統計話一一及一二年的兩次匯金掃貨，MSCI內銀指數分別升17及6%，跑贏同期MSCI中國指數的8.4%及2%升幅，今次會唔會歷史重演？之不過今日唔同往日，現時唔單止中國經濟被睇淡，仲有影子銀行風險，內銀或者短期見底，但今次要大幅跑贏其他中字派，恐怕並唔容易。

股市對內地資金面緊張之憂慮，抵銷了匯金托市掃入四隻內銀A股的消息，也限制了港股表現。昨日恒指跌過230點，最後拗腰平收21,225點，成交唔多，僅592億，全日沽空成交65.2億元，沽空比率重返雙位數，去到11%。

航運股趁勢炒一轉

個市無嘢好炒，地產股之後，輪到賤過地底泥嘅航運股發威，借環球大型船舶需求反彈，近排波羅的海乾散貨指數由月初的801點，幾個箭步反彈15.4%去到前晚的925點。不過，今日指數仍僅及○八年高峰期11,793點的十三分之一。筆者都係果句，股票唔可能永遠向下，跌到咁上下，夠平自然有人出嚟博反彈。尋日中海集運（02866）最神勇，升13.6%，中遠（01919）升6.1%、中海發展（01138）及太平洋航運（02343）都各升4.3%。論基本因素，確實好難睇好航運股，但好似中遠，今年一直被空軍(目及)到實，累積沽空大，挾起上嚟補倉都補到氣咳，尋日大成交挾上50日線樓上，短期返到3.8至4元並唔過分。

蒙牛（02319）宣布收購雅士利（01230）的詳情，二者將於今日復牌。繼增持上游原奶供應商現代牧業（01117）股權後，蒙牛今年第二大舉措就係收購雅士利。顯見，自中糧入主，蒙牛致力整頓內部生產流程及銷售渠道過後，現正以行業改革領軍者的角色，四出發掘併購目標，以善用上市融資功能，加快完善產業鍊，並透過與海外同業合作，全面提升生產技術，滿足消費者對食品安全嘅要求。

過去行業發展不盡人意都好，基於社會對食品安全的要求，及食品行業戰略考慮，中國乳業須要有本土大型業者主導的國策要求明確不過。從中糧入主開始，蒙牛使命清晰。睇好內地乳業改革進度，蒙牛長線可睇好，現價往績市盈率30倍，若上半年業績確認盈利重拾增長軌道，估值尚有上調空間。