股海實戰：東風 可睇位收集
港股先跌後回穩，上晝見沽盤力壓大笨象（00005），匯金增持四大行A股，但內銀H股無動於衷。午後大笨象止跌，多個板塊升幅擴大，如航運股、博彩股及汽車股等，恒指一度轉升14點，收市報21,225點，微跌0.02點，成交590億元。若然周內聯儲局會議結果未有再引發金融市場大幅波動，月底前嘅魚缸主題應離不開基金半年結。
法國雷諾在電動車發展上具豐富經驗，東風若能與其組合營，可謂如虎添翼。(資料圖片)
匯金入市掃四大行A股，給予市場嘅訊息應該屬正面，但內地經濟增長動力今非昔比，加上內銀資產質素受關注，故匯金入市效應比對往年失色。
光伏股前景存變數
保利協鑫（03800）遭中投配售股價，尋日股價跌12%，收報1.84元。今次中投減持規模銀碼唔細，加埋依家內地水緊，光伏業前景展望又存變數，未知接貨者背景，係咪純粹左手交右手，抑或落入強者手，且留意未來數日嘅權益披露資料會否見端倪。
汽車股尋日有買盤到，長汽（02333）升4.6%、比亞迪（01211）升2.9%、吉汽（00175）升2.4%，東風（00489）升幅相對溫和，收報11.44元，升0.17%。上周，內地傳媒報道，法國汽車生產商雷諾（Renault）將與東風組建合營，合作拓展內地電動車市場，涉及投資額12億美元，將在武漢建立廠房，整體規劃年產能30萬輛，估計建設須時二十八個月，項目相關嘅環境評估已於五月下旬獲得批覆，估計年內可獲得其餘所需批文。
隨着中央致力推動環保節能，未來電動車市場將喺國策支持下快速成長，乃商家必爭之地。若然東風與法國雷諾合作拓展內地電動車市場消息屬實，將有助推動產品多元化，快速追趕潮流，迎接電動車市場嘅龐大商機。此外，雷諾喺掌握電動車生產技術方面有豐富經驗，係目前唯一喺環球市場同時銷售四款電動車嘅汽車生產商，實力毋庸置疑，相信這個中法配搭一旦成事，可喺內地電動車市場佔一重要席位。
回說東風嘅股價走勢，今年以來維持喺10至13元水平上落，本月股價喺11元水平找到承接，支持位按季上移，但考慮到10日線剛跌穿50日線，故不用心急追貨，可待回落至11元樓下再分注收集。
