樓市出更：新例怎依循 終達共識
一手住宅銷售條例生效後，各大中小型發展商紛紛變成「驚弓之鳥」唔敢推盤，業界多番表達條例存在不清晰嘅地方，要求當局釐清問題。地產建設商會昨再度與一手銷售監管局開會，雙方成功取得突破性進展，會後更首度一齊會見傳媒，表明會議氣氛融洽，絕大部分問題已達共識，商會相信陸續會有更多樓盤推售。
地建會梁志堅（右三）表示，與銷監局就開售前七日二十四小時提供樓書的做法已達成共識。左三為銷監局專員馮建業。
地產建設商會同銷售監管局尋日下午三時喺中環嘅商會總部開會，雙方夾埋有成30人到場，經過差唔多三粒鐘商議，雙方喺六時許一同會見傳媒公布喜訊。
僅剩簡單細節待覆
地建會執委會主席梁志堅同劉Sir講，會議氣氛好融洽同有建設性，絕大部分問題已有共識，佢仲好客氣咁多謝監管局撥出時間解答會員問題，會上大家都友善和諧講清楚，可能仲有一點、半點好簡單細節嘅事，要局方考慮多三兩日先可回覆，但對原則上無太大影響。
一手住宅物業銷售監管局專員馮建業都話，尋日開會雙方都已坦誠交換意見，銷售監管局執法時一定會保持合理性，未來雙方亦會定期開會，令業界清楚條例內容。
梁志堅坦言，雙方大致已就條例問題開過3、4次會議，今次就算唔係最後一次亦已差不多，因為要了解的已傾清楚，細節亦得到局方協助，包括開售前七日二十四小時提供樓書做法已有共識，若發展商租用的大廈晚上關門，局方容許發展商以任何方法或其他地方令公眾可以獲得樓書亦可。
保養期非限死半年
佢仲話，因條例關係，部分唔可以喺樓書列出嘅資料，好似管理費同非電器用料說明等，可另以在紙張或刊物等向買家表達。而地盤250米以內要提供嘅資料，雙方已大致達成共識，發展商要盡責任喺地盤周圍睇過晒，清楚列出政府要求的約40多項，若發展商已「盡辦法亦無辦法」，如不可上門入人地屋企睇人哋嘅嘢，局方亦會接受。
至於樓盤保養期亦非一定限死半年，發展商仍然可以提供一、兩年保養期，並於樓書以外資料列明。
另恒地（00012）代理銷售嘅粉嶺逸峯，尋日啱啱公布新一批95伙的價單，實用面積平均呎價約9,493元。
新例達成共識重點
1.開售前七日二十四小時提供樓書的做法已有共識，若發展商租用他人大廈作售樓處，晚上關門後局方容許發展商以任何方法或於其他地方提供樓書。
2.部分不可於樓書列出的資料，如管理費及非電器用料說明等，可以另外方式列明，如在紙張或刊物向買家表達。
3.地盤250米以內要提供的資料，發展商須盡責任於地盤周圍巡視，清楚列出政府要求的43項資料，若已「盡辦法亦無辦法」提供，局方亦會接受。
4.樓盤保養期亦非一定「限死」只有半年，發展商仍可提供1、2年保養期，並於樓書以外資料列明。
