恒指期貨走勢

國家隊匯金入市增持銀行及保險A股，威力卻在H股市場顯現，港股開市見21,007點全日最低位後，一路被挾，中午休場前升至21,272點全日高位，之後就牛皮靠穩，下午波幅109點，收21,225點，升256點。即月期指高開4點後，平倉盤湧現，頭一個鐘已成交逾2萬張期指，收市升258點，低水95點，扣除除息因素後低水56點。

恒指期貨走勢

計埋上周五反彈82點，港股兩連升，但成交就一日少過一日，昨日主板成交只有562億元，相比上周四大跌市的800幾億銀，少咗三成，升市來得唔實在，似乎還是跌市更可靠。

美國聯儲局本周一連兩日議息，為市場留下大做文章的空間，尤其是伯老說話前言可以跟後語有不同的解讀，增加即市波動，港股跟勢而為，仲要睇埋內地政策風向，短期在區間上落居多，維持小注小炒策略，始終技術反彈的最大原因都係一個「平」字，彈到咁上下就有阻力，持好倉者，睇住21,327反彈阻力，挨近又升唔穿不妨小注試沽。