有消息指中央將再次出招打救光伏業，刺激相關股份昨日急彈。（資料圖片）

恒指重上21,200點水平，但成交僅565億元，顯示聯儲局議息前市場觀望氣氛濃。恒生地產指數升3%，但大摩最新報告話，雖然地產股嘅估值已屆惡劣水平，但若出現類似○九年嘅全球金融風暴或再有打擊樓市炒風措施出台，地產股可能有更大嘅下跌空間。大行睇法亦如此審慎，睇嚟想撈底地產股嘅長線投資者宜放慢手腳！

有消息指中央將再次出招打救光伏業，刺激相關股份昨日急彈。（資料圖片）

電池股超威（00951）同天能（00819）排隊發盈警，但上周五已急跌，尋日表現反而靠穩，超威升2%收場，天能則微跌0.5%。天能去年上半年賺3.76億元人仔，全年賺7.1億元人仔，即係話下半年盈利已開始倒退，剛發出嘅盈警預計今年上半年營業額同比大幅增加，但利潤同比大幅減少，其實市場應不太意外，次季股價亦已累跌逾三成，現價已回落至NAV（3.455元）水平。

天能可分注收集

若排除有其他不利消息，睇好內地電動車動力電池市場前景以及今年底內地將執行《鉛蓄電池行業准入條件》利好行業龍頭，兼且又唔怕揸民企股嘅話，此股現價長線可開始分注收集。

光伏股又炒中央出招打救，事緣內地報道指上周五國務院常務會議提出擬推六項措施以解決光伏業嘅問題，新政策或於月底出台，興業太陽能（00750）急彈8%，收報8.09元；保利協鑫（03800）及卡姆丹克（00712）分別升7%及6%、陽光能源（00757）及漢能太陽能（00566）分別升12%及6.9%。跟炒嘅話，阿莊建議揀興業同漢能。

今年三月曾減持興業至低於5%嘅HSBC Global Asset Management，上月中以平均價7.593元增持興業391.5萬股，持股量又再重逾5%，至5.19%，基金翻兜露玄機。股價方面，興業股價喺四月初見低位5.47元後止跌回升，上月反彈至9元關前掉頭，上周股價低見6.8元，但尋日又迅即重上10日線7.6元，並喺8元樓上收市。震盪完成，短線有勢試衝9元關。

至於漢能，上月股價維持喺0.48至0.55元水平橫行，本月上旬一舉突破0.6元關，上周整固後，尋日一度高見0.63元，收報0.62元，成交回升。技術上，MACD牛叉擴闊，10日線升穿50日線，現黃金交叉，均利好短期走勢。小注一試博佢行轉快上試0.7至0.72元水平，回吐支持喺0.55至0.58元。不過，請恕阿莊長氣，此股無錯係價細好炒，但波動性一向較大，上車要量力而為，宜抱玩過山車心態，且須嚴守止蝕紀律。