不少地產代理昨日在維港灣車位銷售處外「兜客」。

新例生效後發展商遲遲未敢輕易恢復推售全新住宅盤，新盤市況淡靜，唔少發展商為免售樓業務陷入停頓，相繼推售車位等非住宅物業。信置（00083）尋日就首度向奧運站維港灣非業主買家出售車位，由於租金回報率料可高達4厘，單日速售至少7個車位，有外區投資者更以約224萬元大手購入兩個車位收租。

不少地產代理昨日在維港灣車位銷售處外「兜客」。

維港灣

發展商最新車位推售情況

住宅新盤市道未見起色，信置尋日起首度向維港灣非業主買家發售車位，成功吸引市場注目。

田兆源落場督師

據悉，屋苑目前尚餘230個車位可供發售，每個售價約106萬至135萬元，而促銷代理幫手賣出1個車位，就可以獲得1萬元佣金。劉Sir去到賣車位現場，見到唔少代理喺售樓處內外「兜客」，連信置聯席董事田兆源亦親自到場督師。

代理老友透露，維港灣成個屋苑有成2,000幾個住宅單位，但車位就只係得500幾個。之前發展商一直只係向屋苑業主發售車位，尋日起先開始接受非業主買家選購，雖然只係可以租畀住客，但由於估計可以租到大約3,500至4,000元，租金回報率相信有3.5至4厘，所以吸引唔少投資者垂青，一開售就速沽7個車位，當中6個係由非維港灣業主購入。

聽代理老友講，一個來自港島區嘅投資者，由於睇好維港灣車位租務需求同前景，大手以約224萬元連購兩個車位收租。有消息話，當局雖限制銀行只可為車位提供最高四成按揭，但有銀行透過額外提供私人貸款形式，向維港灣車位買家提供變相高達七成貸款，該屋苑今個月暫時賣咗14個車位，發展商套現逾1,500萬元。

新盤可招標發售

劉Sir八到，銷售監管局昨日向地產建設商會回覆一系列業界提問，其中包括首次表明發展商可以用招標形式發售新盤單位，而有關單位並唔需要事先發出價單。另該局今日將會同商會再度開會，進一步解釋條例、指引及作業備考等內容。