恒指期貨走勢

美國零售銷售好過預期，美國國債孳息亦回落到2.17厘，氣氛稍見緩和，經過洗倉式下跌的亞太區股市找得一個反彈藉口，日本股市上周五終止四連跌，恒生指數甫開已見21,083點，十點半前升至全日高位21,164點，升277點，惟直至尾市三點前，指數波幅只有逾百點，最後一個鐘升幅明顯收窄，21,000點得而復失，埋單報20,969點，升82點，反彈乏力。

恒指期貨走勢

問價先問量，上周四一度跌逾700點，大市成交877億元，周五主板成交縮至703億元，恐慌性拋售未即時延續，相信是淡倉連番取勝後，先作收斂，技術性反彈的意味強烈。

上周五全日沽空84.44億元，沽空比例12%，自六月六日起，沽空成交均多於一成，沽壓未減，可見恒指由五月二十日高位23,512點累挫至今，好友力量薄弱，要待一個似樣的挾倉出現。

期指上周五收20,873點，成交合約6.7萬張，低水96點，除息後實際低水11點。既然恒指未能快速地回補去年九月的上升裂口20,147至20,476點，似乎仲未跌夠，即市開好倉的短線策略，又食唔到幾多波幅，好易賺頭蝕尾，頂多注碼細細貼市玩，反彈位睇21,327點。