Daphne堅持不使用糖霜或忌廉，但她的蛋糕和曲奇依然好味道。

也許因為生活壓力，致使香港人對甜點情有獨鍾，蛋糕餅店開得特別多，要穩住陣腳，口碑、味道、賣相缺一不可，要突圍而出，就更加需要出盡法寶。在競爭接近飽和的今天，除了經營成本高的地舖「首當其衝」，就連創業容易守業難的網上生意亦不能幸免，今次介紹的Daphne Chow，就憑着耐心和美術天分，總算在糕餅森林裏成功立足，營業額亦漸有增長。

Daphne堅持不使用糖霜或忌廉，但她的蛋糕和曲奇依然好味道。

跟大部分全情投入的創業人士有別，從創立Daphne Cheese Cake & Cookies開始，Daphne就沒有打算投入全職整餅行列，因為她深明網上業務競爭大、增長慢，加上整餅是個人興趣，不希望為了賺錢而粗製濫造，所以寧願業餘經營，以平面設計養活自己，盡量用心做好每一單生意。

業餘整餅 純為興趣

由於沒有「發大嚟做」的念頭，Daphne選擇了最低成本的創業方法─開設facebook專頁，當然她也明白箇中利弊，她表示：「喺facebook開專頁不用成本，對於打算試吓市場反應嘅我好適合，不過搵生意就好睇人緣，因為初期會幫襯嘅都係自己朋友，要靠口碑介紹先慢慢有新客，而且facebook格式有好大限制，回響一定唔及自己網頁，不過要控制成本，呢個已經係最好嘅平台。」果然不出Daphne所料，開設專頁初期，訂單都來自朋友，半年後開始有顧客經朋友介紹落單，而近半年更開始有街客主動查詢，雖然只佔整體業務兩成，但這個生意漸上軌道的迹象已令Daphne十分鼓舞。

不用忌廉 拒絕糖霜

有了專頁，也要在產品多花心思才能繼續開拓客源，這方面Daphne已早有對策，她分析道：「市面上其實不缺造型特別的糕餅，但共通點是需要用上大量糖霜或唧花，因此我從這方面落手，標榜不使用糖霜或忌廉，只以食用色素提高牛油曲奇的可塑性，雖然限制了造型變化，而蛋糕亦只能供應芝士和朱古力味，但起碼真材實料，唔會好睇唔好食。」

除此之外，Daphne的貼心服務亦是留住顧客的關鍵，每次接到生意，她都會跟顧客詳細溝通，了解產品用途，再以電腦繪製草圖予顧客確認，若有意見更可修改至滿意才正式製作，送貨當日又可選擇在港鐵站交收，大型餅店確實難以如此照顧周到。不過由於每單生意都是度身訂造，因此Daphne要求顧客最少一星期前落單，試過因此而錯失了部分「趕時間」的新客，她認為：「做唔成生意都覺得可惜，不過明知做唔切，冇理由夾硬接，皆因生意唔係一次性，要保持水準先可以Keep到客。」重質不重量，有份正職果然可以慢工出細貨！