魚缸Blogger：百勤油服重現吸引力

頁岩氣概念板塊炒咗咁耐，上周因負面消息，股價連跌幾日，不過尋日卻變身跌市奇葩，唔少股份都先跌後升，彈力驚人，其中百勤油服（02178）即市一度急跌7.7%，低見4.75元，惟最終以接近全日高位5.4元收市，倒升4.8%。

百勤去年業績翻一番，收入同純利分別增長5.4倍及一倍，皆因內地強調頁岩氣開採及勘探（頁岩氣資源全球第三），帶動市場對增產服務的需求。

受上周國稅總局公布，七月一日開始實施生產煤層氣及頁岩氣增值稅率17%外，加上有報道指個別在第二輪頁岩氣探礦權中標的企業，因開發陷入困境而萌生退意，而且原本將於下半年進行的第三輪招標或會延遲，規模仲會有所縮減。幾個不利消息，令頁岩氣板塊跌Watt。睇番幅圖，百勤股價自三月掛牌起沿住10日線上升，期間創下6.38元的上市新高，經過今輪嘅調整後（高低位差距25%），估值同值博率變得吸引，唔大貪先睇6蚊。