太陽日誌

好嘅唔靈醜嘅靈，周初十年美債息抽上2.26厘創十四個月新高，聯儲局對退市態度愈曖昧，華爾街股市愈不安，加埋A股休息期間，內地PPI、出口數據、審計署就省地方政府債務報告等負面消息，一鋪過反映晒在尋日復市的A股身上，滬綜指撻2.8%，拖累尋日港股跌467點，報20,887點。跌市成交激增，去到879億的近三個月最高外，尋日單日有185隻牛證被打靶，是牛證史上最慘烈的一日，另外國企指數亦連開十一鋪細（跌），平了自九四年以來的最長跌浪紀錄。

太陽日誌

綜合大行預測東風業績

年初至今，港股累積跌幅7.8%，在亞洲區由尾數上嚟第一，同滬綜指的5.3%跌幅，堪稱難兄難弟，對比近期先開始高位轉弱的美日股市，同期累積的14.4%及19.7%升幅，中港股市弱成點顯而易見。

尋日尾市港股拗腰跌少兩百多點收市，加埋大市唔夠一個月由高位跌近2,600點，相信會吸引到唔少股民博反彈。但有兩點教筆者對博反彈有所猶豫，一，港匯轉弱，尋日見7.7660，差些少同今年低位7.7664睇齊，資金流出情況未有改善；二，強勢的美股未出現較大的調整，留意道指及標普五百指數，過往跌穿50日線，往往會再有3至5%的追跌情況，周三晚，指數距離50日線重要支持位14,969及1,610點十分接近，只怕終極一跌出現，會令港股在低位多踩一腳。走勢上，恒指已跌穿21,423點，再數落去較大支持，可能要去到去年九月份留低的上升裂口20,146至20,475點。

東風搶比亞迪飯碗

中汽協公布今年首五個月內地乘用車銷售按年增15%，至726萬架，單是五月140萬架，按年升9%，但按月跌3%，稍差過市場預期的145萬架，經銷庫存周轉率由四月的2.3個月微跌至2.2個月，仍高企。

傳統六月進入內地汽車銷售淡季，銷售數字有驚喜的可能性比較低，尋日幾隻車股統統跟市跌，唯獨東風（00489）因為同雷諾組合營發展電動車項目，逆市升2.9%，收11.3元。筆者一直留意電動車市場消息，個人最睇好美國Tesla，至於歐洲，暫以雷諾發展最積極，旗下電動車系包括Twizy、Zoe、Fluence、Kangoo，一次過包晒大中小型車及客貨車市場。今次與東風合作，屬百利而無一害，或者最頭痕係比亞迪（01211），今次肯定多個香爐多隻鬼。