高盛認為未來幾年內地航天軍工開支大增下，中航科工將受惠。(資料圖片)

內地股市長假後復市，一如預期追跌，加埋日圓同日股又再發瘋，日經急挫逾6%，觸發港股出現恐慌性拋售，恒指低開逾兩百點後急速下滑，最多曾跌701點，雖然多個技術指標顯示港股已呈超賣，近日備受沽壓嘅地產股亦開始回穩，但大市反彈力度依然有限，最終收報20,887點，跌467點，成交增至879億元。顯然，債市波動對股市所造成嘅壓力揮之不去，全球金融市場大量資金正在因應宏觀預期改變而進行調配，呢類市難以捉摸，缸邊友宜珍惜銀彈，隔岸觀火，等市況回穩再作部署。

高盛認為未來幾年內地航天軍工開支大增下，中航科工將受惠。(資料圖片)

尋日即市反彈幅度，較似樣嘅只有頁岩氣股，宏華（00196）由即市低位2.71元反彈上高位3.16元，收報3.14元，升4.6%；巨濤（03303）及安東（03337）亦報升收場。反觀重磅嘅內銀股表現疲弱，尋日除淨嘅建行（00939）跌幅最大，達3.2%。

憧憬救市不切實際

究竟是次魚缸跌浪何處是底，阿莊都冇水晶球。客觀而言，長假前已見到內地市場流動性顯著趨緊，情況相信係○七年十月以來最嚴重嘅，加上經濟數據疲弱，實不利A股表現。另一方面，從上大人口氣可以推斷，人行減息嘅機會不大，憧憬救市措施嘅來臨亦不切實際。是故奉勸各位做好股市繼續大幅波動嘅心理準備，戒急用忍，別被短線極度超賣嘅反彈所誘惑，保留實力耐心迎接長期底部出現。

「六絕」應景，繼續停留喺魚缸短打游擊嘅缸邊友宜注意風險，量力而為。回看阿莊嘅持倉，早前買入嘅中國公共採購（01094）表現比想像中強，再行轉快就會把握食胡機會，另中燃（00384）逆市升1.6%收市，報7.37元，坐咗咁耐，唔爭在等埋二十六日公布末期業績再作定奪。

神十成功發射，但撞啱大跌市，航天股表現未見突出。高盛剛發表一份關於內地國防工業嘅報告，指未來五年中國空軍戰機數目將翻一番，喺一三至一七年國防開支逾7,200億美元支持下，中國現代機隊規模將超越俄羅斯，並收窄與美國嘅距離，而中航工業集團旗下直升機及航空製造企業將成最大得益者，故給予哈飛及中航科工（02357）買入評級，其中中航科工十二個月目標價由4.2元調高至4.8元，相等於一四年度預測市盈率23倍。尋日該股收報3.67元，跌1.8%，不妨留意3.5元承接，作中線部署。