尖沙咀廣東道地舖，受國際時裝品牌進駐帶動，洽租轉旺。（資料圖片）

尖沙咀廣東道雙號一個吉咗差唔多一年，個舖連埋樓上幾層同外牆廣告位有時裝店一口氣成萬呎傾緊，月租大約700萬元。代理老友同劉Sir講，因為近排有國際大品牌進駐，帶動氣氛。另同街去年開始放租嘅中藝等用緊嘅地舖連一樓巨舖，有傳話拆開3個舖都有人傾緊，業主意向月租加埋約1,500萬元。

尖沙咀廣東道地舖，受國際時裝品牌進駐帶動，洽租轉旺。（資料圖片）

尖沙咀及旺角商舖最新租賃個案

尖沙咀廣東道近排多咗國際時裝品牌進駐，吸引時裝店洽租上述吉舖及樓上數層，面積加埋約1萬方呎，月租講緊約700萬元。據悉，上址地下曾經係化妝品店租用，舊年農曆年後已遷出，四年前月租只係40萬元。

旺角舖貴八成續租

至於廣東道星光行地下及1樓等樓面，面積共約3萬方呎，租戶以中藝為主，另包括超市等，業主意向月租共約1,500萬元，現時有興趣租戶包括珠寶金行，若果斟緊嗰3個商戶洽租，反映上址未來極有機會分間3個舖位。

近月金行頻頻喺旺角西洋菜南街搶舖，有連鎖化妝品擔心租用嘅舖被搶埋，啱啱續租該街道其中一個雙號地舖，月租大約70萬元，以面積約700方呎計，呎租約莫1,000元，較現租金增加逾80%；聽講佢喺條街另一龍頭舖租期就到，業主叫緊180萬元。

葵涌工廈七千萬洽

工廈物業收租回報高，喺依家股票市場動盪時期，更加發揮資金避難所作用。聽講葵涌永得利廣場其中一座低層全層，依家由數據中心租緊，收租有5厘，有個梁姓投資者斟緊買，涉資逾7,000萬元，呎價近3,900元。

另外同區和黃物流中心一個超過6萬方呎倉儲用巨位，畀間物流公司睇中，依家傾緊租，月租大約80幾萬元，呎租約莫13元。

近年荃灣唔少新建工廈陸續入伙，代理稱，億京發展興建嘅區內海盛路3號工廈樓花盤，其中低層大部分樓面舊年連命名權賣畀投資者尖東廣場羅守輝或有關人士，物業最快下個月交樓，物業擬命名為TML廣場。