股海實戰：水務股 可以翻兜

本周初標普調升美國主權評級展望至穩定，觸發投資者拋售美國國債，美國三十年期國債孳息升至14個月高位。睇嚟聯儲局出口術讓市場率先為「退市」作準備嘅策略奏效，讓大家有秩序「疏散」。債市波動衝擊股市，新興市場顯得尤其脆弱。之不過，圍繞「退市」嘅憂慮仍多，最終會否喺今年下半年落實，仍存未知數，但呢個不明朗因素，足以令下半年股市變得波動，缸邊友入市要抱「玩浪」心態，決定要快狠準！

領匯撈底言之尚早

假前地產股好似食咗瀉藥，房託沽壓未消，置富（00778）及領匯（00823）同跌逾3%。由於唔少散戶鐘意揸領匯，面對其單位價格由上月高位46.4元跌至本周二低位36.95元，眨眼唔見10蚊，都咪話唔肉痛！不過，阿莊唔建議大家溝貨，事關走勢顯示，若未能喺短時間收復250日線38.6元，繼續反覆尋底嘅可能性極大，一味加注，恐怕只會愈踩愈深！

新興產業股表現個別發展，頁岩氣股呢期成當頭跌，宏華（00196）一度失守3元關，周二收市跌9.6%。如果早前聽大摩所講，此股未來六十日內睇升而入市，跌穿晒位又唔識走嘅話，呢次真係中正魔笛毒咒！反觀科網股同光伏股氣氛唔太差，但當然呢類股個別累積升幅亦頗大，要提防跌市到咁上下，部分資金又開始沽強勢股套現，低吸價賤嘅傳統經濟股，故若然冇貨喺手，呢個時候先入市高追科網股，宜注意風險。

環保水務股係相對穩陣嘅板塊，周二北控水務（00371）微跌0.3%，中國水務（00855）無升跌，光大國際（00257）微跌0.7%。即使內地經濟增長略為放慢，對淨水嘅需求有增無減，環保水務業務前景展望相對穩定。純睇走勢，光國股價落到5元邊，中線又可以諗翻兜。中國水務今年以來股價呆呆滯滯，至上月才起步，由2.2元水平反覆升至本周一高位3.13元，近半個月成交開始轉趨活躍，短線回吐守穩10日線2.89元可保持反覆上升格局。

至於北控水務，股價由四月低位2.16元升至上月下旬高位2.96元回軟，做定兩手準備，短線企穩10日線2.84元樓上，有機會試衝3元關，但若再次喺3元關遇阻回落，較穩陣嘅做法，係等回試去年第三季延伸嘅上升軌支持2.3至2.5元水平先至入市。