樓市出更：工商舖摸貨 縮8成冇停
政府月前加重印花稅後，物業炒賣成交量慘不忍睹。睇番代理嘅資料，今年工商舖物業「摸貨」註冊量連續跌四個月，上個月更只係得72宗，按月少逾42%，較一月份更大幅減少84%，而摸貨比率亦插水到15%都冇。
近期觀塘駱駝漆大廈摸貨錄蝕讓。而投資者李冠亮就估計八月份工商舖摸貨交投續靜。（資料圖片）
李冠亮
今年工商舖摸貨走勢
摸貨成交最慘淡嘅，相信都算係工廈物業，上個月摸貨註冊量僅得22宗，數量係舊年一月之後的新低。投資老手李冠亮（Nelson）估計，今年八月份工商舖摸貨比率可能跌到落單位數字。
劉Sir睇見美聯工商舖（00459），同埋市場嘅資訊嚇咗一跳，今年一月工商舖摸貨註冊量達約442宗，摸貨比率達約24.3%，創舊年一月以來新高。雖然農曆新年期間傳統例靜，但二月摸貨比率仲有約12.9%。
駱駝漆大廈輸40萬
不過，踏入三月份，上述措施對市場炒賣的實際影響浮晒出嚟，三月及四月份工商舖摸貨比率各佔約19.7%及21.7%，拍埋今年初高位，就知炒風熱潮減退緊。
上個月工商舖摸貨仲少，只得72宗，摸貨比率跌至約14.7%。咁多物業中，近幾年被炒起嘅工廈物業，炒風回落最明顯，上月份只有約22宗摸貨註冊登記，按月少近70%，期間摸貨比率亦只佔12.2%，按月少近19個百分點。
工商舖短炒成本高，加埋投資氣氛麻麻，低價、平手及蝕讓離場個案日日有，摸貨獲利幅度按月減少。代理話，上述措施之前，工商舖摸貨賺幅都有超過15%。例如尖沙咀麼地道雙號地舖今年一月以約5,400萬元摸出，原業主揸咗兩個月，帳面袋約700萬元，賺幅約16%。
不過，近排市場蝕讓成交愈嚟愈多，好似觀塘駱駝漆大廈1座低層戶今年三月以近1,220萬元摸出，原業主持貨約半年，料帳面要損失約40萬元離場。
摸貨比率或不足10%
Nelson話，依家工商舖炒家根本冇可能生存，唔少今年初入市嘅炒家，半年成交期快將到期，預期今年六月及七月將會係工商舖物業摸貨高峰期，摸貨比率仲可能升多數個百分點。
不過，Nelson話，八月份摸貨比率可能回落至10%以下的單位數字。
