澳元兌美元走勢

澳洲儲備銀行一如所料維持利率在2.75厘不變，上次會議時央行講明依家匯率好貴，未來有減息空間，言下之意就係一日澳洲紙唔跌，未來都要繼續減息，問題係澳洲紙跌咗8%，究竟央行收貨未？結果會後聲明話你知央行仍未滿意，揚言日後仲有減息空間。市場似乎對央行在第四季減息0.25厘已有共識，如果係咁，澳元只會有反彈無轉勢。

澳元兌美元走勢

澳洲第一季GDP比市場預期差，不過難以認定未來經濟必定轉差，匯價隨時可以做番個似樣的技術反彈。而且九月十四日澳洲政府大選，選舉過後先減息可能係合適時間。如果未來一季經濟未見惡化，而澳元匯價繼續下跌而令央行覺得跌夠的話，會唔會到時先發現，其實「減息論」只係空城計？到時匯價跌夠，央行出其不意暗示唔需要再減息，可能係其中一招。

技術上，澳元再進一步就要睇一一年十月初的低位0.9250至0.9380，呢個算係一個重要嘅支持區，如果見到呢個價，不妨去買，距離反彈嘅日子應不遠。換句話講，依家澳元跌咗咁多，雖然大勢仲係睇淡，不過想沽都要等個靚位，現價可謂買賣兩閒，大位就係0.93同埋0.98水平，接近呢個水平先算係荀價入市，現價0.95剛剛喺中間，相當尷尬，入市只宜小注，不宜重倉。