銅鑼灣霎東街有地舖獲財團以約四億洽購。（資料圖片）

港島銅鑼灣舖位售價有升無跌，近年吸引唔少財團响區內密密手掃貨，不過由於租金唔係好郁，回報就低得好緊要。好似近住時代廣場嘅霎東街9號地舖，依家有投資者出價近4億元洽購，計番個舖依家畀時裝店每月只係約18萬元租緊，收租回報僅0.5厘。

銅鑼灣霎東街有地舖獲財團以約四億洽購。（資料圖片）

銅鑼灣核心消費區地舖租售個案

劉Sir聽講依家有個財團斟緊霎東街9號地舖，涉資近4億元左右，以個舖面積約2,200方呎計，呎價大約18萬多元，計計數算合理，不過，以上址月租約18萬元計，收租回報僅約0.54厘，相信係近年新低。

舖價14年升逾43倍

上址業主九九年嗰陣獨具慧眼，只係以900萬元購入上址，一直揸到依家，若果真係近4億元賣出，舖價約十四年升逾3.9億元，升幅超過43倍。

有代理畀份土地註冊處資料，霎東街9號由地下至5樓組成，分前後部分，近幾年樓上不斷有買賣成交錄得，每宗由747萬至2,173萬多元都有，相信今次有機會係財團睇好幢樓重建潛力，回報唔高都照買。

波斯富街僅漲租5%

銅鑼灣租金點貴都追唔上售價，所以唔少核心街舖收租回報率偏低，一般只有一至兩厘多。

聽講同區波斯富街77至83號地下部分，現租客係髮型屋行業，啱啱以每月約20萬元續租，新租金只上升約5%；另同區怡和街9至15號地下部分，畀手提電話銷售店以每月近35萬元承租，比起前租客燕窩店月租只高兩萬元，增幅得6%。

睇番土地註冊處資料，尖沙咀亞士厘道10、12及14號同宜昌街3、5及9號地下E舖，以7,100萬元賣咗。西環卑路乍街38號天星工業大廈再錄買賣成交，尋日錄得該廈今年第6宗全層成交，單位係11樓全層，金額同之前5層一樣，都係2,800萬元。