股海實戰：中國公共採購 等炒格
內地股市連休三日，長假前市場流動性明顯趨緊，拆息抽高，應驗上周初表叔老友話要提防內地水緊，唔好咁進取入市嘅說法！恒指上周五跌到落接近250日線現承接，但技術上10日線已確認跌穿50日線，死亡交叉表示後市將繼續調整。雖然現時14日RSI已回落至29，但眼見散戶仍死牛一面頸，一味買恒牛博反彈，相信呢個「屠牛記」尚有下文，想撈重磅股，最好等本月下旬先至動手。
內地物流市場商機惹人憧憬，中國公共採購不乏炒作空間。（資料圖片）
雖然身處跌市，但升幅榜都係座無虛席。好似上周五，方正孖寶方正數碼（00618）及方正控股（00418）均見異動，升幅分別為53%及6.4%，成交活躍，估計與憧憬系內重組活動有關。
異動股小注即日鮮
供水股中國水務（00855）及北控水務（00371）均逆市升2%收市，粵投（00270）微升0.3%。所以話，跌市唔係完全冇嘢好炒，每日(目及)實五十大升幅榜發掘異動板塊及股仔，小注跟風炒即日鮮，亦有可為。
上周阿莊就留意到一隻靜極思動嘅細價股，呢隻就係中國公共採購（01094）。好老實講，個人印象對於呢個冧巴冇咩特別好感，只係見其股價上周逆市上升，一周升幅逾六成，且成交大增，才有興趣研究吓。翻查資料，原來前華潤高層陳樹林已成公司執董，應該唔簡單。再睇如今公司主力拓展內地電子化公共採購行業商機，其中國夥伴為「國採科技」，去年年報公司披露已獲授權與多地政府採購中心實施合作協議， 建設電子化公共採購平台及提供技術支援。
老實講，中國地大物博，十年前魚缸經已講緊炒中國物流商機，但到依家市場發展依然分散。早前馬雲等民企家就話要大搞物流網絡，就放長雙眼睇吓做唔做得起。回說呢隻股，現時市值61億元，主打賣點係其中國夥伴─國採科技被視為屬中央背景企業，股東包括中國物流與採購聯合會同中國電子商會等。另一個概念係找來前紅籌大班當管理層，就博吓呢位有能力之士喺商場一展身手搵真銀！總括而言，呢隻股似係等炒格，去年旗下中國公共採購網開通，且看中績顯示能否帶領公司轉盈，另可關注下半年能否順利喺前海推出金融服務電子平台。
股價方面，今年四月初告別長期停牌歲月，復牌首日先抽上0.79元再回落至0.495元收市，之後一直橫行，上周股價異動成交大增，善於刀仔鋸大樹嘅缸邊友可望多兩眼！
