威靈頓街近年漸有時裝街的影子。

中環皇后大道中一線街舖早已變身成國際時裝名店街，而兩街之隔嘅威靈頓街亦逐步被攻佔，近一年間靠近蘭桂坊一段街道明顯多咗時裝店，佔該段街店舖數目約三分之一。條街除咗冇晒賣古董嘅店舖外，連一啲舊式本地時裝店都所剩無幾，租金亦已翻幾番，呎租升到近200至400多元，同兩年前相比升咗差唔多七成，難怪有鞋店租戶已投降轉租旺角區。

威靈頓街近年漸有時裝街的影子。

售賣女裝鞋的Iris表示，威靈頓街舖租愈來愈貴，只有連鎖大時裝店才有承租能力。

時裝店承租威靈頓街店舖個案

皇后大道中核心街舖呎租閒閒地逾千元，好多睇好中區零售前景嘅時裝店老闆，只好向呎租仍然幾百蚊嘅威靈頓街埋手。

外國品牌貴一倍爭贏

劉Sir數過，時裝店數目約有20間，佔該段街商舖數目約三分之一，而之前雄霸呢條街嘅古董字畫店，早就搬走晒，其餘賣髮型用品、同埋度身訂造女裝衫嘅小店，依家數目加埋都唔夠5間。

呢條街近年漸漸有時裝街嘅影子，所以每有租盤都好快有商戶承租，聽講該街道一個雙號地舖連樓上幾層，原本由一間連鎖時裝店租用，租客推出頂租無耐，好快就畀一間賣牛仔褲嘅潮服店頂上，月租約40萬元，同之前租金差唔多，平均呎租約114元。而呢條街近年租金亦已升咗唔少，依家呎租要近200至400餘元，兩年左右升咗約七成。

有舖位代理話，由於條街有潛質成為區內第二條時裝街，唔少區內已有分店嘅大品牌都想喺度爭據點，好似有個已經喺中區大商場有分店嘅外國時裝品牌，月前就以約80萬元租咗呢條街一個雙號地舖，呎租約400元，比之前租緊嘅本地時裝店，租金加咗約一倍。

鞋店呻難做轉租旺角

兩年前開始喺度落腳嘅Iris話：「依家租緊嘅單號地舖，以售賣英國設計師設計嘅女裝鞋為主，月租不足10萬元。早排業主嗌加租近一倍，以每對鞋賣800至1,000元計，加埋成本同人工等，每日最少賣10對至圍到本，根本冇得做，所以唔續租，依家租咗旺角新舖。」