股海實戰：報復股跟炒要小心

道指條上升通道多月來首度跌穿，轉勢迹象愈來愈明顯，日本已先行一步，如果印銀紙可以解決問題就老早冇煩惱。昨日是「穿窿日」，道指跌穿15,000點，日經跌穿13,000點，恒指跌穿22,000點，港股依然係「跟跌唔跟升」，走勢圖10日線跌穿50日線現死亡交叉，但下個支持位好明顯，250日線在21,468點，而四月十八日低位為21,423點，所以有膽色之士可於21,500點樓下入第一注，但距今只約400點，而且「六絕」有排都未過。

防守板塊不敵淡市

藍籌股得長實（00001）同利豐（00494）兩隻唔使跌，領匯（00823）再跌2%，上星期下跌仍可「賴」美債孳息上升，但現時債息回軟，房產信託、收租股及公用股等防守板塊在弱市毫無防守力，要錢唔要貨乎？睇近期股債商品冇樣掂，熱錢究竟去咗邊？

之前跌市都有消息股可以炒吓，但昨日冇一個板塊突出，連日強勢之風電股先升後跌，前日炒電網翻修之成都電纜（01202）及東北電（00042）更大幅回吐，濕濕腳就走唔切。不過，有3隻「報復股」就自成一系，繼前日商務部公布向歐洲進口葡萄酒「雙反」調查後，昨日再傳出會向歐洲進口車反傾銷立案。歐洲每年輸華葡萄酒總值只係10億美元左右屬小意思，但汽車屬歐洲重要工業，有乜依郁連德國都捲入經濟衰退漩渦。

然而，「報復股」亦只係個別炒起，通天（00389）續升8.8%，但剛發完盈警之中國食品（00506）已回軟；而本地汽車股亦只炒長汽（02333）及比亞迪（01211），其他車股則冇份，只可以用兩間公司屬「根正苗紅」的本地品牌作解釋。不過，貿易戰呢樣嘢大多虛張聲勢，愈大鑊愈難發生，所以炒呢類股要自己執生。

每逢大跌市，不少公司會利用增持或回購支持股價，但近日見出手的例子不多，較特別是中聯重科（01157）管理層斥1.37億人仔增持A股，顯示對公司有信心，弊在中聯重科多次受匿名信攻擊造假，連續兩季業績亦唔爭氣，撈底切莫過勇。

另一隻跌得甘嘅股係創維（00751），同受樂視之超級電視威脅，但TCL多媒體（01070）卻硬淨好多。之前一度成為市場焦點的超級電視，下月初將正式開售，但首批只有2萬部，照計對傳統電視影響輕微，點解創維會勁跌，暫時未有答案。