東旭苑一個高層單位，剛以綠表價逾五百四十九萬元成交。(資料圖片)

「白居二」準買家整裝待發，綠表居屋市場繼續發力。劉Sir收到風，筲箕灣東旭苑一個高層單位以綠表價逾549萬元成交，為全港綠表價次高。而將軍澳居屋市場成交續旺，有代理老友估計該區居屋樓價將會升3至5%。

東旭苑一個高層單位，剛以綠表價逾五百四十九萬元成交。(資料圖片)

買家搶爆居屋實錄

有代理老友爆料，東旭苑高層3室，建築/實用面積829/650方呎，以逾549萬元綠表價成交，建築/實用呎價6,622/8,446元。

劉Sir知道，今次係東旭苑近兩、三個月以來，兩度創出屋苑綠表價新高紀錄，先前屋苑B座一個高層4室以548萬元綠表價賣出，今次成交比舊紀錄推高咗萬多元，但比起史上最貴嘅同區東濤苑就仲有距離，該盤半年前一個D座高層5室以綠表價600萬元易手。

龍蟠自由價399萬即簽

近排居屋樓價走勢銳不可當，美聯丘松原話，香港仔雅濤閣2座中層G室，建築/實用面積689/576方呎，以495萬元綠表成交，創屋苑同類單位綠表價歷史新高。

香港置業鄒岳殷話，鑽石山龍蟠苑G座高層8室以399萬元喺自由市場賣咗，新買家見價錢合理即時「扑錘」，建築/實用呎價7,748/9,950元，創同則呎價新高。

美聯馬立成話，將軍澳居屋盤源極速消化，現時全區只有約180個居屋放盤，比起上個月少咗約70個，相信區內居屋做價會升約3至5%，而該區煜明苑A座中層14室啱啱喺自由市場以336萬元賣出。

世紀21富山馮靜宜話，牛池灣彩峰苑一高層10室，建築/實用面積約801/597方呎，以同類綠表新高價390萬元放售，相比五月底放盤急增50萬元，加幅接近15%。

白表免補地價購綠表居屋嘅實質運作劉Sir都未搞得清楚，不過祥益謝澤銘就好體貼，特別安排銀行職員周六、日駐守公司居屋專門店（天盛分行）解答按揭疑難，仲會免費協助綠表居屋業主同「白居二」準買家，辦理申請購買資格證明書同埋可供出售證明書。