內地保健品市場增長潛力大，瑞年藉發換股債引入中信國通，可望成未來業務發展的一大助力。(資料圖片)

日本魚缸對安倍發出嘅「第三箭」投下不信任票，亞太區魚缸受拖累，恒指亦曾跌穿22,000點，反而A股表現相對硬淨。也許大家要慶幸，正由於次季冇新錢流入香港魚缸，即使如今外邊風大雨大，港股表現相對平淡，反正仍留喺魚缸嘅一批資金繼續遊走於不同板塊搵食，勉強足夠撐起個場！

內地保健品市場增長潛力大，瑞年藉發換股債引入中信國通，可望成未來業務發展的一大助力。(資料圖片)

阿莊100萬元投資組合

尋日適逢係世界環境日，風電及光伏股便成跌市奇葩，歐盟反傾銷稅率比預期低，加上憧憬阿爺出手打救，光伏股不跌反升，而風電股則受惠大行唱好，金風（02208）、中傳動（00658）、大唐新能源（01798）及華能新能源（00958）升幅介乎3至8%。科網、手機、風電股都經已先後翻炒，唔知幾時輪到家電、燃氣抑或者頁岩氣股。

地產股可伺機低吸

兩幅港人港地得主由中資背景地主取下，本地地主幫真失威！回顧今年以來，本地樓市成交萎縮，地主股股價表現不濟，累跌幅度普遍超過兩成，尋日新地（00016）曾一度失守百元大關，低見99.9元。近期二手成交有所改善，照計班大地主都要跑數，下半年應較積極推盤，月內會留意中線低吸地主股嘅機會。

瑞年國際（02010）尋日股價亦有異動，高位曾見2.46元，收報2.43元，升9.46%，成交4,108萬元。上周三，瑞年宣布發行非上市可換股債券（CB）及認股權證，以及與中信國通訂立戰略合作框架協議，公司最多可籌6.6億元，作為一般營運資金及以備日後收購之用。今次可能引入成股東嘅中信國通有來頭，且精於健康產業方面嘅投資，二者合作可引來憧憬，故見消息公布後，瑞年股價由1.92元抽高至上周四見2.59元，之後回咗三個交易日，尋日又再現大陽燭，睇勢若成交配合，有力抽穿上周四高位2.59元。

內地保健品市場增長潛力大，但問題係市場缺乏有效監管，過去唔少保健品質量出問題，加上市場關注民企股嘅內部監管水平，故對相關股份估值亦打了折扣。瑞年現價往績市盈率僅四倍多，某程度反映市場對呢家民企股嘅睇法，尤其係見到去年公司收入按年微降1.9%至17.5億人仔，但應收帳卻增兩成多至6.48億人仔。且看今次與中信國通合作，能否提振投資者信心，從而改善估值水平。

另一個要注意嘅係，今次發行嘅CB年利率有6厘，最終持有人會唔會換股係未知數，但若然CB及認購權均獲全數行使，估計中信國通將持有瑞年16.38%股權，而以CB及認購權證換股價每股3元計，再計及潛在攤薄影響，行使價相等於往績市盈率6.8倍，股價仲炒唔炒得起，就要睇二者戰略合作能否令投資者心動！