魚缸Blogger：金蝶國際發力追落後

呢期科技股人氣爆燈，社交網絡、網絡遊戲及雲端等訊息技術服務產業受捧，去年內地軟件產業收入增長三成至2.47萬億元人仔，主力企業管理軟件及服務嘅金蝶國際（00268）都發力追落後，幅圖呈現V形反彈，尋日即市一度挾到去1.83元，創咗五十二周新高，逆市升逾2%，收報1.75元，下站阻力上移到兩蚊。

去年上半年蝕2.1億元人仔的金蝶，全年虧損縮至1.4億元人仔，主席亦話最壞時刻已經過去，今年有信心可以扭虧為盈，由於北京的軟件園已經開幕，所以今年未有大額資本開支。另早前麥格理出報告唱好，預期公司首季虧損將會大幅收窄，原因係期內收入大致持平、低端軟件需求復甦，同埋成本有所下降，睇好佢可以跑贏大市。隨住金蝶開拓銷售渠道及雲管理服務，既然捱得住過度期，今年公司有望進入新一輪增長周期。

金蝶國際（00268）