太陽日誌

港股一二年最後一個交易日，恒指收22,656點，兜兜轉轉，因憂慮美國退市，尋日港股跌109點，報22,282點，比去年底仲要跌1.7%。港股要沉淪到幾時？真係要問阿爺，尋日滙豐五月中國製造業PMI終值，向下修訂到49.2，離50盛衰線又遠一步，今日港股中資企業比例愈來愈高下，中央維持疲弱的經濟「自由發展」，港股氣氛要全面改善並唔容易。

太陽日誌

綜合大行對中信泰富之預測（港元）

尋日淡友相當積極，沽空佔成交比率連續四日企穩雙位數字，沽空額60.9億，比率10.3%，升跌股份比例68對32，是七個交易日最差。上周五收市後，劉央愛股銀基（00886）發盈警，預告全年業績見紅，上星期五離奇抽升，尋日已經跌凸，隊低9.5%收1.71元。銀基上半年蝕掉1.77億（人民幣．下同），全年見紅是預期之內。銀基的問題係中央反貪，禁絕公費豪飲，去年茅台價跌近三分之一，近期仲未止瀉，五糧液價錢大同小異。

三月中銀基高管增持，睇嚟對恢復市場信心作用唔大，去年九月的中期報告，最得人驚係21.1億存貨及應收帳，足足係資產淨值17.95億的1.17倍，以半年營業額2.35億，擔心全年業績一旦有存貨減值或者應收帳撥備，損失唔係1.77億乘二咁簡單。

真係市有市跌，股有股炒，三月至今上市新股，居然得朗廷（01270）及中石化煉化（02386）兩隻潛緊水。老友問起對中石化煉化睇法，會唔會係中石化冠德（00934）子憑母貴翻版？由炒作角度，單睇保薦行「牌頭」，高盛、摩通、瑞銀加埋中信証券（06030）掛帥，中煉化確係有啲睇頭，但如果睇基本因素，中煉化同冠德透過注資逐步揍大的玩法唔同，本身煉油、化工及煤化工程項目的設計同工程生意已經十分成熟，內地生意基本上完全來自石油石化產業三大巨頭（佔生意額八成以上），單係阿媽中石化集團，已佔佢收入過半數，去年達50.2%。

中煉化前景睇唔通

喺內地，煉油建設工程唔係阿茂阿壽都做到，意味無比較下，中煉化項目毛利率無乜討價還價條件，尤其上市後中石化仲揸住67%，賺多賺少出於主理人想將經濟成果，放在上層公司抑或下層子公司浮現出來，相比之下，揸中石化至少約莫知每年採油及煉油賺蝕幾多，筆者才疏學淺，中煉化自認係唔識睇。

屋漏偏逢連夜雨，近期鐵礦石價及澳元齊齊插水，股價一路向南的中信泰富（00267），消息話旗下中澳鐵礦項目第一條生產線技術上遇到問題，又要停產兩個月進行修檢，股價跌4.4%，收8.78元，睇怕去年九月的四年低位8.64元，今浪未必頂得住。

自炒燶外匯之後，中信泰富真係無好過，鐵礦石項目遲遲未見回報，今日內地製造業對鐵礦石需求已大不如前，令前景轉眼間一片矇矓。尋日兩份大行報告都用資產折讓夠大為理由，認為股價跌得八八九九，但睇番近半年仲留低喺港股搵食嘅資金相當揀擇，夠平但無復甦故事配合都無人吼，過去兩年半中信泰富市帳率由1.5倍碌落依家得返0.4倍，客觀睇已經好平，但如果唔係見到鐵礦石價因為中國經濟轉強而出現報復式反彈，千幾隻股票又點解要揀佢？