有見移動通訊設備需求殷切，中芯亦加強相關業務投資，但對盈利的實質推動作用，仍有待時間驗證。(資料圖片)

官方同滙豐嘅五月份內地製造業PMI數據現背馳，係官方數字欠準，抑或有人藉數據唱空中國？平心而論，從魚缸表現推斷，也許滙豐嘅數據與實際經濟表現較為貼切。回說港股，六月首個交易日表現反覆，恒指一度升上22,564點，但滬綜指收市失守2,300點關，恒指又轉升為跌，收報22,282點，跌109點，成交595億元。

有見移動通訊設備需求殷切，中芯亦加強相關業務投資，但對盈利的實質推動作用，仍有待時間驗證。(資料圖片)

阿莊100萬元投資組合

藍籌股中，中信泰富（00267）尋日跌幅最大，達4.4%，呢轉頗大機會要下試五十二周低位8.64元，主要係旗下中澳鐵礦項目第一條生產線停產，預計須維修兩個月，總之一波三折。上周沽出食胡嘅新晨（01148），尋日曾高見3.21元，收報3.03元，升6.3%，總覺得呢轉升得差唔多，暫時唔會諗翻兜。

A股風險正在上升

尋日未有追入騰訊（00700），一來早段已升咗上去，二來表叔朋友來電，話要提防中美兩國元首會面後魚缸就會落閘放狗，皆因喺人行致力打擊針對人仔嘅套利交易下，流入內地嘅資金已放慢，加埋時近年中，市場流動性一般會趨緊，從資金面睇A股風險正在上升，一旦外圍有咩風吹草動，要提防股海又起波瀾！聽完呢番話，買貨意欲大減，暫且放輕入市步伐。持倉中嘅威勝（03393）尋日跌穿5元關，雖然成交唔多，但走勢轉弱，短線反彈若未能重上5元關，會睇位先行沽出，待回試4.5至4.6元水平承接先至會再諗。

中芯（00981）公布擬參與喺北京組建合資企業，項目專注45納米及更先進晶圓技術，總投資額高達279億元，其中93.4億元以註冊資本形式由參與各方支付，中芯將按55%支付其中51.3億元，餘款則由中關村發展集團及北京工業發展投資管理承擔。去年末季，中芯開始量產45納米產品，今年首季，40/45納米產品佔收益比重已由去年末季嘅2.6%提升至6.4%，主要受惠美國及中國市場對移動設備嘅需求帶動。今次公布嘅新投資項目，顯示公司睇準45納米產品商機，加碼投資喺增長較快嘅移動設備市場。

今年中芯嘅資本開支約6.7億美元，以其首季經營現金流淨額1.54億美元看，有足夠能力應付今年嘅資本性開支計劃；至於是次公布嘅新投資，金額唔細，公司截至今年三月底止手頭現金及等值由去年底嘅3.58億美元降至2.92億美元，不能完全排除集資需要，至於會唔會炒高配股，阿莊始終認為，呢隻股蟹貨太多，首季業績公布後嘅股價升勢，已反映咗上半年持續轉盈嘅因素，喺見到更多支持盈利前景持續改善嘅數據前，估計其股價只會維持上落，波幅介乎0.56至0.72元。