土瓜灣偉恒昌新邨恒景閣無契盤以200萬元開價拍賣，低市價近三成。(資料圖片)

依家想搵三百萬細價私樓一啲都唔容易，肯平賣而且位處市區嘅「筍盤」，就更加係瘋搶嘅目標。嚟緊土瓜灣偉恒昌新邨恒景閣有個無契盤，透過私人拍賣行僅以200萬元開價拍賣，低市價近三成，相信可以吸引到唔少有意入市嘅準買家注意。另外，沙田第一城再有低於三百萬嘅單位放盤，隨即被外區用家以280萬元連約購入，單位建築/實用呎價約6,829/9,211元。

土瓜灣偉恒昌新邨恒景閣無契盤以200萬元開價拍賣，低市價近三成。(資料圖片)

市場平價盤連環被搶

劉Sir同代理老友傾開，話近排受居屋熱潮帶動，細價樓又再起動，唔少肯平少少嘅細價樓迅即被市場消化。

而下周忠誠拍賣行就推拍偉恒昌新邨恒景閣I座低層14室無契盤，單位承法院令以200萬元開價拍賣，實用面積約336方呎，計番實用呎價約5,952元。據拍賣行所講，項目一般同類有契單位估價達約280萬元，以今次呢個開價計，比市價低咗有成28.6%，相信會引來市場注意。

第一城筍盤賣280萬

大型屋苑有「筍盤」更加係絕無僅有，世紀21奇豐吳元利話，沙田第一城再有低於三百萬樓放盤，屬5期46座低層H室，建築/實用面積約410/304方呎，推出後即獲外區換樓客以280萬元連約購入自住。

除呢類細價樓外，肯平賣嘅中價樓亦連獲承接，世紀21日昇何俊傑話，北角康華大廈低層D室，建築/實用面積約645/558方呎，以590萬元售予同區投資者作長線收租，建築/實用呎價約9,147/10,573元，比市價低約一成。

城市花園低一成沽出

低市價嘅仲有同區嘅城市花園，世紀21北山彭志偉亦同劉Sir講，城市花園9座中層F室兩房海景單位，建築/實用面積約723/642方呎，獲外區換樓客以大約900萬元購得，成交價同樣低市價一成。