諗住改名做富智康嘅富士康國際（02038），呢期鹹魚翻生，事關大行發功唱好，喺成交急增下，上周五狂飆18.2%，以近全日高位4.41元收市，短短一周累積升幅四成，有見已經突破前高位4.2元，形成雙底反彈，頸線阻力上移到去年二月高位6蚊，下站先睇5蚊。

富士康為全球手機行業代工巨頭，去年收入倒退17.5%至52.4億美元，盈轉虧，蝕3.16億美元，前年則賺7,284萬美元，查實公司去年下半年虧損9,000萬美元，比上半年顯著減少六成，原因係提升營運效率、成本合理化及資源優化，及出售資產。至於今輪升浪亦同業務復甦有關，富士康預期中期業績好過去年，美銀美林料Sony、小米及魅族等品牌可帶動盈利增長，而大摩就睇好其成本控制及客戶產品組合方面，分別畀佢目標價4.3元及5.5元。

富士康國際（02038）

阻力位：5元

支持位：4元