太陽日誌 2013/6/3

上周五，美國經濟數據好壞參半，尤其上月美國個人開支意外地下跌0.2%，可惜無減市場對聯儲局退市的憂慮，十年美債息見過2.21厘近兩年新高，道指大插插208點，儘管日、韓、台股反彈，但港股驚定先，再跌92點，收22,392點，ADR及場外衍生產品就顯示，今早港股開22,200至22,300點機會相當大。

太陽日誌 2013/6/3

綜合大行預測李寧業績（人民幣）

滙豐中國五月製造業PMI去到49.6的七個月低位，但五月份中國官方PMI，卻意外地由50.6升至50.8，主要是生產指數由52.6回升至53.3所帶動。兩個數據呈現官升民跌的結果，或多或少反映大型國企的景氣展望，的確遠勝民企，但相信不足以影響近期陸續下調中國全年經濟增長預測的分析師睇法。反而今次數據後，中央短期推出新的刺激經濟措施甚至減息的機會細咗，數據對股市影響屬中性。

聯想集團走勢向好

個市唔掂，但無阻細價股尋寶熱，上星期五恒指及國指成分股，高或低過50日線比例，分別係17對33同13對27，簡單啲講係三隻成分股之中，兩隻已低於50日線下，正處弱勢，反而市值50億及10億元以下中小型股份，高或低於50日線比例分別係644對534同385對347，強勢股仲係比弱勢股多。

上月科網股表現優於大市，圍繞互聯網、手機製造、流動通訊增值服務、以至電子、軟件、網遊等股份百花齊放，確實係近年鮮見嘅現象。正積極拓展手機及平板電腦業務嘅聯想（00992），近周股價表現比想像中好，10日線已抽穿50日線，上周五一度高見8.02元，收報7.99元。短線若能以大成交突破三月下旬高位8.29元，可反覆上試8.8至9元阻力區；若未能突破，則可待回試7.6至7.7元水平支持再作考慮。

大股東及私募基金出怪招低位增持的李寧（02331），果然有後着，股東大會後管理層透露，去庫存工作於下半年可達標，但講啲唔講啲，無提最近同店銷售情況，但營運見底預期，就足夠令上周五股價急升15.7%，見5.29元。

李寧難玩在於大股東動向難測，大行估今年要蝕3.5億元人仔，明年賺1,500萬至2,000萬元人仔，一五年有2.58億元人仔利潤，但都講緊21倍市盈率。早輪史提芬話4元博得過，一來兩大主要股東傾向3.5元加注，以一成多損失死唔到人，其次四、五月期間，股價在4元水平上下，累積唔少沽空，今次一挾，話唔埋可順勢補番一月5.9至6.15元的下跌裂口。