石藥由原料藥及成藥延伸至創新藥業務，效益逐步顯現。(資料圖片)

內地五月份製造業PMI為50.8，按月上升0.2個百分點，表現優於市場預期，有助紓緩市場對內地經濟增長放緩嘅疑慮，並提振本周初兩地股市表現。踏入六月份，意味基金半年結嘅日子將至，四、五月恒指變動都不大，六月份基金紛飾窗櫥活動下未必有「六絕」出現，但向上動力暫看亦有限，反正喺冇新錢持續流入嘅前提下，相信港股會維持上落市格局，恒指主要波幅仍介乎22,000至23300點。至於板塊方面，從五月下旬開始嘅資金流向觀察所得，科網股有機會成為「六月之升」，龍頭股騰訊（00700）股價成功守喺300元樓上，阿莊亦計劃捧場，周內會睇位上車。

石藥由原料藥及成藥延伸至創新藥業務，效益逐步顯現。(資料圖片)

本月上旬市場一大焦點，乃中、美兩國元首會面，相信此前兩國魚缸唔會有咩亂子出現，人仔亦會維持強勢。值得留意，上月滬綜指已扭轉了連續三個月嘅跌勢，若然六月份A股維持五月份嘅升勢，則第三季A股唔好睇得太淡！

中航信異動可吼

回說板塊表現，科網股升勢有擴大迹象，上周五阿莊話隻中國電子（00085）有理由炒上，當日開市初段回咗三格就頭也不回，一直抽到上全日高位見2.12元，收報2.1元，升15%，成交6,103萬元，表現令人喜出望外。若然想繼續留意相關股份，見到上周五隻專門做航空信息技術服務嘅中航信（00696）成交明顯增加，收報5.6元，升3.3%，似要向上闖關，小注跟進，目標上試6元關，跌穿5.4元止蝕。

業績消息方面，石藥集團（01093）上周五宣布首季度業績，收入25.48億元，同比增長2.7倍，純利同比增長74%至2.18億元，每股盈利（攤薄）3.74仙。季績表現理想，主要反映公司收購康日集團後，業務由原料藥及成藥，延伸至創新藥業務等，效益正逐步浮現。首季收入及毛利分別相等於去年全年嘅61%及45%。整體而言，首季業務發展與市場預期相若，由於收購康日設有保證利潤，加上預期今年原材料藥整體表現相對平穩，現價一三年度預測市盈率約18倍，喺同類股中估值唔算貴。

早前，公司主要股東減持，配售價3.6元，主要原因係要增加公眾持股量，見到配股後股價亦基本上守穩招股價之上，相信貨源集中喺機構投資者手中。鑑於季度業績對辦，盈利前景展望穩定，可視為醫藥股中嘅實力之選，中線策略可喺3.8至4元區域分注收集，目標價4.5元，止蝕位3.6元。