何文田佛光街豪宅地（紅線），最高估值逾43億元。（資料圖片）

今個月真係截標「停不了」，今日同埋嚟緊嘅星期五，西鐵元朗朗屏站（南）限呎項目同埋何文田佛光街豪宅地會先後截標，由於短期有唔少土地供應，劉Sir都覺得會攤薄財團競投意欲，而且一手新例搞到唔少新盤未賣得，朗屏站（南）又喺新盤較多嘅元朗區，估計截標反應未必咁好。何文田豪宅地就真係唔使太擔心會反應差，兩幅地估值最多共逾60億元。

何文田佛光街豪宅地（紅線），最高估值逾43億元。（資料圖片）

本周兩幅截標住宅地資料

今日截標嘅朗屏站（南）限呎項目，雖然早前收到近年鐵路項目最多嘅20份意向書，但奈何星期五截標嘅何文田豪宅地始終比較矚目，劉Sir相信或多或少會削弱財團競投該鐵路項目嘅意欲。

再者，發展商對一手新例仲未好適應。老友高緯環球張翹楚就話，依家發展商賣樓有好多顧慮，相信投地都會好小心，會審慎揀選地皮。由於新例實施延誤咗唔少新盤推出時間。今日截標嘅朗屏站（南）正正位於新盤比較多嘅元朗區，估計今次截標反應都未必咁好。

朗屏建720伙 今截標

一如以往，該鐵路項目設有單位限制，須提供唔少過720伙，當中實用面積唔多於538方呎嘅中小型單位佔約59%，市場估值約莫14.92億去到16.27億元。

雖然市場唔敢太睇好上述限呎項目，但星期五截標嘅何文田佛光街與常富街交界豪宅地就唔同講法，地皮位處市區豪宅地段，又不設限量等條款，競投氣氛相信唔會太差。

何文田地細 值43億

好似鄰近地盤嘅何文田常樂街與常盛街交界「百億地王」，喺今年三月以約116.88億元批出，樓面呎價約10,233元。而今次截標嘅土地規模較細，總樓面約38.7萬方呎，投資額及風險相對較低，市場都覺得樓面呎價會較理想，現時上限估值約1.13萬元，估值最高約43.82億元。而周五截標嘅仲有馬鞍山保泰街商業地，總樓面約16.4萬方呎，其中約8.6萬方呎須作商店等用途，估值約6至6.6億元，樓面呎價約3,650至4,000元。