魚缸Blogger：首鋼資源可炒落後

上周五煤炭股普遍逆市靠穩，其中表現較為突出嘅首鋼資源（00639），上升1.6%至3.1元，查實主要股東生命人壽保險一直都有密密掃貨，持股量已由去年底的5.19%增至17.02%，不過股價依然仲係踢唔郁，去年業績倒退亦已反映晒，要炒落後嘅話，暴炒妹心水係佢。

首鋼資源主力生產焦煤，價格受生鐵及鋼材需求影響。隨住城鎮化的發展，內地加大基建投資將可帶動鋼鐵終端需求，有見上月粗鋼產量按年增長6.8%，估計焦煤價格殘極有譜。

另上周瑞銀出報告，話對煤價走勢看法雖仍審慎，但首鋼每單位成本比同業低，同埋現價預測市帳率只有0.8倍，基於風險回報吸引，認為佢係行業首選，畀佢目標價3.56元。睇番幅圖，股價自二月創出3.65元的五十二周新高後反覆回落，至月初由低位2.87元回升，配合短線黃金交叉利好，如果成功升穿100日線3.22元，應該有力再試今年高位。