Fundman睇市：騰訊 候調整再上車

睇嚟短期港股仲係抖氣格局，以時間消化早前升幅，上周五夜期跌153點，因為美股早段腳軟，不過尾市美股已經止跌，相信港股今早平開機會唔細。至於日股，一係唔跌，一係就無端端狂隊7%或者1,143點，上周四，投資者同日本政府財金發言人都對大跌市出奇咁冷靜，睇番資金流，過去兩星期日本股市錄得96億美元淨流入，創歷史紀錄，再一次證明，當市場上清一色變晒好友，亦係市況需要調整嘅時候。

日本提出無限量寬令通貨再膨脹（reflation）後，日股用半年時間，累積八成一升幅後，跌番8至10%，絕不稀奇，有投行話，井噴式上升在日本早在上世紀三十年代試過一次，日經平均指數七個月內狂升76%，跟手回吐8%，之後再升28%。

買無可買基金焗賭

客觀而言，除非市場對安倍經濟學、黑田主張reflation嘅兩個主題抱有懷疑，震盪過後，日本仲係好大機會重現牛氣，尤其日本投資者仲陶醉在安倍振興計劃的成效多年罕見，上季達3.5%的經濟增長，如果這一刻日本股市的音樂椅遊戲突然靜音，史提芬會比較擔心，因近期日債孳息一度升穿1厘心理關口，債價急跌，持有大量日債的日本銀行，在不知不覺下暴露在風險之下，資產負債表受損，再惡化的話，可能導致日本長期利率回升。

近期明顯見到資金減持部分防守性較強股份，例如電力、燃氣及家電股，流向其他類型及大落後板塊，就連明知業績麻麻的航運及煤炭股都有捧場客，可見在內地經濟復甦似有還無之下，基金經理經已買無可買，只能抱住有賭未為輸的心態。

基金大球場騰訊控股（00700），自從公布首季賺40.4億人仔，按季增長16.8%，比市場估計理想，股價曾經高見310元歷史新高。自從四月阿里巴巴集團，以5.86億美元買下一成八新浪微博股權後，市場曾經質疑，當年科網熱以用戶人數，或瀏覽次數計算估值的日子再度重臨，但以阿里巴巴首季度盈利達50億元人仔，兩間中國科網翹楚的賺錢能力，其實已非當年美國科網熱時的dotcom公司可比，說成泡沫重現有點說不過去，尤其是兩間賺錢能力驚人的巨頭。

儘管第一季增長不俗，但騰訊管理層認為網上遊戲已進入穩定期，未來業績亮點是手機遊戲，及與微信的商業成效。一○年開始，騰訊估值每每在大約31倍預期市盈率水平掉頭回落，兩次低位則分別在17及21倍左右，現價預期市盈率26.3倍，唔排除股價企穩300元後，會趁氣氛好衝上350元附近，掂一掂31倍市盈率，不過一直無上車的，較適宜等市場炒賣焦點短期遠離網股，或季績麻麻的時候先去上車。