隨着網絡遊戲市場加快發展，網龍的業務前景值得看高一線。(資料圖片)

上周四日股急跌，翌日先升後回，究竟後市會係好友所講嘅營造出「十字星」向上，抑或落閘放狗散水，阿莊呢刻冇信心做好友，但又唔夠膽睇得太淡，畢竟各國不斷開機印鈔，魚缸水浸，而大戶慣常喺股、匯雙邊投注，要將指數舞高弄低實在唔需要太多理由，故還是以平常心看待波動市。針對港股，技術上，上周四、五嘅表現，已扭轉上月中旬以來嘅升勢，留意若本周恒指10日線跌穿50日線，將進一步確認轉弱。

隨着網絡遊戲市場加快發展，網龍的業務前景值得看高一線。(資料圖片)

交銀國際最近嘅中國市場策略報告指，經濟增長放緩同通脹回落一直係中國噩夢，又指上周日股大幅波動，乃繼數周前金價劇烈波動後出現嘅第二隻「黑天鵝」，預測未來股市會有短暫超跌反彈，但美國終歸要行「退市」一步，故提醒投資者做好準備迎接更多「黑天鵝」﹗呢番見解，阿莊都好認同，故再三提醒看官要提高風險意識。

金山軟件報佳音

雖然指數反彈乏力，但上周五個別板塊逆市做好，華能新能源（00958）、大唐新能源（01798）及華電福新（00816）升幅介乎5至13%。此外，上周五內地科網股走強，連帶本港嘅相關股份亦逆市走高，騰訊（00700）反彈2%、網龍（00777）急升17%、金山軟件（03888）升8%。金山喺收市後公布今年首季純利1.95億元人仔，同比增1.2倍，按季增57%，顯示公司快速進入移動服務市場，效益可觀，睇勢股價可反覆向10至12元推進。

講開又講，其實隻網龍自本月十三日就首季業績發盈喜後，股價亦曾走高，至上周回軟，但沽壓不大，上周五更以大成交逆市狂飆，相信升勢未完。網龍係內地網遊及移動互聯網平台開發商及營運商，其91系列互聯網產品及服務，發展令人鼓舞。

事實上，隨着智能手機日漸普及，公司嘅網遊業務發展加快，嚟緊業績可繼續帶來驚喜，尤其係「91」平台發展潛力可觀。上周五，網龍股價急抽上15.32元，相等於一三年度預測市盈率15倍，老實講估值已唔算便宜，但睇見其市值剛升至77億元，一般嚟講市值突破10億美元，有機會觸發新一批基金入市吸納。只係考慮到市況，宜盡量避免高追，先觀望本周初回吐能否守住上周五平均成交價14.32元，守穩其上小注一試，博上16.2元，支持喺13.8元。