政府首次推出兩幅啟德「港人港地」限量地皮周五截標，合計提供超過一千一百伙。(資料圖片)

本港土地資源缺乏，政府為咗要喺短時間內催谷住宅供應，兩年多前除咗主動賣地之外，亦諗到喺出售嘅地皮加入限呎同限量條款，而新一年度賣地，更破天荒推出啟德發展區兩幅「港人港地」限量住宅地，劉Sir相信，由於地皮位置唔錯，將會吸引不少發展商入標，但出價就唔會太進取，而市場預期兩幅地皮上限成交價合共約44億元。

政府首次推出兩幅啟德「港人港地」限量地皮周五截標，合計提供超過一千一百伙。(資料圖片)

兩幅「港人港地」及首批「限呎」及「限量」地資料

啟德發展區內兩幅「港人港地」限量住宅地將於本周五截標，由於地皮位置接近日後嘅啟德車站廣場，故相信可以吸引唔少發展商競投。好似長實（00001）、新世界發展（00017）同會德豐地產等早排已話咗對兩幅地皮有興趣，長實執行董事趙國雄更話會考慮獨資入標。

多限制難免有折讓

不過，兩幅「港人港地」限量住宅規定，批地起計三十年內只可賣畀香港永久性居民，期間任何轉售都要取得政府批文，地皮限制不少，英皇國際（00163）執行董事張炳強同劉Sir講，兩幅地咁多限制，地價一定比起無銷售限制嘅地皮有所折讓，加上呢次嘅條款都幾辣，萬一賣樓時單位滯銷，發展商又唔可以將單位用嚟收租減輕開支，所以要諗清諗楚先決定係咪入標。

資料顯示，兩幅地皮分別係啟德第1H區1號及2號地皮，其中以2號地皮面積較大，兩地皮可建樓面約41.8萬及46.2萬方呎，規定限量不少於545伙及不少於600伙。

附近私樓實呎逾萬

市場估計兩地成交價合共約39.61億至44.01億元，平均每方呎樓面地價約4,500至5,000元。

至於地皮附近嘅二手私樓呎價，平均建築面積呎價介乎8,300到12,000元，實用呎價就11,000到15,700元不等。政府一一年破天荒推出限呎同限量地，市場反應不一，其中該年三月推出的元朗安樂路限呎地，有8家財團入標，以貼近市場估值上限呎價成交，但同年透過拍賣出售嘅沙田九肚限量地，就由信置（00083）及嘉里建設（00683）等合組嘅財團僅以底價55億元投得。